U CEM u shu kren lap lah khlem ka jingtip ïa kaei ba ka Dorbar Shnong ka leh: RS Nongrim Hills

Shillong, Naitung 4: Ka Dorbar Shnong Nongrim Hills kala pynpaw ïa ka jingsngew noh mynsiem ba kat u khlieh duh jong ka Khasi Hills Autonomous District Council kaba peit ïa ka bha ka miat jong ka ri bad ka jaitbynriew halor ka jingmih khubor da u CEM ka KHADC da kaba ong ba ka kot kam pat poi sha ka office KHADC.
Haba kren bad ki lad pathai u Bah Bantylli Nari uba dei u Rangbah shnong ka Nongrim Hills u la ong ba u Chief Executive Member (CEM) u Bah Winston Tony Lyngdoh u la shu kren lap lah khlem ka jingtip ïa kaei kaei ba la Dorbar Shnong kala leh.
Na ka liang ka Executive Committee jong ka Dorbar Shnong kila ai ïa ka NoC ym ha ka kyrteng jong ka Blinkit Grocerry hynrei la ai sha ka kong Banita Kurbah bad haba ka wan na ka bynta ka NoC nga la kdew ïa ki hato phi tikna ban ioh NoC ha KHADC namar ba lada ngi ai ngim kwah ba phin shah kyntait, ong u Bah Nari
Shuh shuh u la ong, Ka Kong Banita kala ai ka kyntien pynskhem ban ong ba kam don jingeh ban ioh ïa ka NoC ban ioh ka Trading License na KHADC, ong u Bah Nari
U Bah Nari u la ong, Hadien ba ka Blinmit kala sdang ïa ki jingshna, ka kong Banita ka la wan biang ban pynphai noh ïa kata ka NoC bad hadien ba la pynphai noh ïa ka NoC ila ong ba kim trei shuh bad ka Blinkit bad hadien ka EC kala ai noh sha kawei ka company jong ki Khasi hi MSSO bad u Director u dei u Bah Meban Nongsiej bad kane ruh kadei ka rai jong ka EC.
“Ngi ai ka NoC namar ba ngi iohi ba kaei ka KHADC ka lah leh bad la kren ruh da u CEM hapoh ka dorbar ba kano kano ka kam kaba ïatrei lang bad ki Khasi ki kloi ban ai ïa kata ka Trading License bad da kane hi ngi shim bad ngi sngewthuh ba ka lah don ruh ki kot ba la phah na KHADC ha kaba ïadei bad kane ban NoC ïa kini kino ki company lait noh kiba ia trei bad ki briew ba nangne” ong u Bah Nari
Shuh shuh u la ong, “Ngi bud ïa kata ka jingbthah jong u bad ngi la leh kumta, te ka Ececutive Committee ruh ka shim ïa kane namar ba haba ngi shong ha kane ka shuki ngi peit ruh na ka bynta ka jingbha ki kup shilliang ki sem shilliang”.
Lada ïa kren kumba ong u CEM ba kan ktah ïa kita ki saw hajar tylli ki dukan kiba hapoh sor Shillong bad napdeng ki saw hajar katno kidei jong ki para Khasi jong ngi, hynrei kaei ba ka Dorbar Shnong ka kham pyrkhat rangbah ka long ba ngi pyrkhat na ka bynta u hynriew lak ngut u nong shong shnong ha nongbah jong ngi bad na ka hynriew lak kumta saw lak kidei ki kidei kiba trei bad napdeng kine ki saw lak kumba ar lak kidei kiba trei mynstep bam da miet ban thied ïa ka bam jong ki, u la ong.
“Ngi ïa kren na ka por sha ka por ïa ka jingjihar ka pyrthei, mhi ïa kren ïa ka jingkiew dor ki marbam hynrei kam pat ju don ba naka liang ka sorkar ne District Council ban leh eiei halor ka jingkiew ki mar bam” u la ong.
“Ngi ai ka NoC ïa ka blinkit, ka long kumba la kren u CEM ba 20 haduh 22 percent ki ai discount bad lada 20 haduh 22 percent ki ioh ki nongthied, mynta u kup shilliang u sem shilliang ha ka shi taiew kin lut beit ha ka bai bam bad katno ka iarap ïa kiba told ha ka kamai kajih bad haba don kum kine ba iarap ia u duk u suk hato phin ym kner ki kti” u la ong
Katkum ka jingong u CEM ba nga soi marwei ïa ka NoC ka long kaba bakla namar ba nga soi ryngkat bad u Secretary bad ryngkat u Rangbah Dong, ong u Bah Nari.