Shillong, Naitung 04 : Ka Department for Promotion of Industry and Internal Trade (DPIIT), Sorkar India, ryngkat ka jingïatrei lang bad ka Directorate of Commerce and Industries jong ka Sorkar Jylla, ka la pynlong ïa ka SAMVAD – Investors and Industry Outreach Programme ha u bnai ba la dep ha Vivanta, Shillong.
Ka jingthmu jong kane ka prokram ka long ban pynsngewthuh paidbah shaphang ka Uttar Poorva Transformative Industrialization Scheme (UNNATI) 2024, ban kyntiew ïa ka jingwan ki nongbei tyngka sha Meghalaya bad ban pynlong ïa ka rynsan ban ïa syllok hapdeng ki nongkhaïi, ki nongbei tyngka, ki nongmihkhmat jong ki karkhana bad ki heh ophisar ka Sorkar.
Haba ai jingkren ha kane ka prokram, u Anindya Bhattacharya, Director ka DPIIT, u la pynpaw ba ka UNNATI Scheme ka dang ïaid shaphrang bha ha Meghalaya. U la ong ba haduh mynta la ïoh pdiang 101 tylli ki application, bad 73 tylli ki dang don hapdeng ka jingbishar bniah.
U la ong ruh ba ka prokram ka la pyni ïa ka jingkiew ka jylla ha ki bynta bapher bapher, khamtam ha ka kam jngohkai pyrthei bad ka hospitality sector, kiba la khring bun ki nongbei tyngka ban seng kam bad ban bei tyngka ha Meghalaya.
Ha ka bynta ba khatduh jong ka prokram, la pynlong ïa ka rynsan kylli jingkylli bad phylliew jingmut ha kaba ki nongkhaïi bad ki nongbei tyngka ki la ïoh ban ïakren beit bad ki ophisar jong ka DPIIT bad ka Sorkar Meghalaya halor ki rukom rejistar, ki kyndon ban ïoh bynta ha ka scheme, ki kot ki sla ba donkam, ki jingïarap pisa (incentives), bad kiwei pat ki lad jingïarap ban pynsuk ïa ka jingbei tyngka ha jylla.
Ki ophisar bad ki heh na ka sorkar kiba donlang ha kane ka sngi kikynthup naduh ka Hudabia Nafis Khan, Consultant, DPIIT, Anindya Bhattacharya, Director, DPIIT, u ML Wanshong, Director, Bah Winfred Warshong, Joint Director bad Bah Chesterfield Lyngdoh, Deputy Director, Directorate of Commerce and Industries ka sorkar jylla.
