Da ki skhim sorkar ne na ka KAAC wanrah ki Karbi ha Lapangap, pyrshah jur ka HBDRF

Shillong, Naitung 03: Kumba long mynta ka jinglong jingman ha ka shnong Lapangap, ki paidbah nong shong shnong ki pyrshah jur ïa ka jingleh jong ki Karbi namar ba kim poi pyrkhat ba ha ka jingïasoi ïa ka jingïateh kular la mynjur ban rep ïa ki mar rep ba mih katkum ka aiom hynrei ka long kum ka jingshah shet kylla.
Katkum katei ka bad ha ka jingïa soi la thoh ban ai lad noh ban rep ïa ka kait bad Sohtrun nalor kiwei kiwei de ki jait marrep.
Haba ïa kren bad ki lad pathai khubor u Chairman jong ka Hynniewtrep Border Dispute Redressal Forum (HBDRF) u Bah Chandame Sungoh u la ong ba ki nong Lapangap ki dang mut ban ïa rep hi ki trai shnong Tahpat, tangba kumba i mynta ym long shuh ba rep da ki trai shnong namar ba la wanrah ki tractor ki puh shilum.
“Katkum ka jingtip ba la ioh imat kine ki Karbi kila don lypa ka plan ban wanrah noh da ki grant bad ki scheme, kiba lah ban dei ki scheme ka sorkar Assam ne na ka Karbi Anglong Autonomous Council bad na ka liang ka Forum ngi sngewkhia bad pyrshah ïa kane” ong u Bah Sungoh.
Shuh shuh u Bah Sungoh u la ong, “Lada wanrah hangto da ki kynja scheme jong ka sorkar ka long ban kam train oh ïa kato ka jaka namar ba ym long shuh ban rep ban riang para trai”.
“Jin lada rep beit u Tahpat hangto na ka liang jong ngi ngim don eiei ka jingpyrshah hynrei ban wanrah da ki scheme te ka long ban kam trai noh ïa kato ka jaka bad kane ka jaka ka dang hap hapoh u pud u sam jong ka shnong Lapangap” ong u Bah Sungoh.
Hynrei kaei ba sngewsih katkum ka jingtip ba la ioh ki nong Lapangap ki sngewsih jur ïa ka jingleh jong ki Karbi namar bad a lade hi nga la ioh ban kren bad u Waheh Shnong bad u la ong ba kim poi pyrkhat ïa kato ka jingïateh kular ba ïasoi ban mynjur ban rep ïa ki mar rep kiba mih katkum ka aiom, ong u Bah Sungoh.
Shwa jong kane, ha ka jingleit hiar hi ki heh myntri sorkar jong ka Meghalaya bad Assam bad kumjuh ruh ka jingdon lang ki CEM jong ka JHADC bad KAAC, kila pynlong ka jingïa kren ban wanrah ïa ka shongsuk shongsain ha katei ka jaka hapdeng ka jingiakynad b alai ne saw snem.
Na ka liang jong ngi, ngi pynpaw ka jingsngewnguh ïa ki ar sorkar ha ka jingshim khia jong ki na ka bynta ban pynneh ïa ka shongsuk shongsain khamtam ïa kito ki nongrep kiba don shato ba la ioh ban leit rep leit riang da kaba suk.