Sei ki SRT ïa ka met u Bah Kyrshan na ka thliew dewïong ba khlem pyndonkam ha Rymbai

Khliehriat Naitung 03: Ki shipai SRT ha ryngkat ka jingiatreilang bad ka kynhun pulit ba na East Jaiñtia Hills District hadien ba ki la ngam shapoh ka thliew dewïong kaba don um, kaba khlem pyndonkam shuh, mynta ka sngi ka 3 tarik u naitung ha ka por janmiet ki la lah ban sei noh shabar ia ka met iap jong u bah (L) Kyrshan Lamurong, 34 snem kyrta uba na ka shnong Tongseng-Nongkhlieh.
Ki thymmei khubor ki iathuh ba la suba ba ki runar ki teh da ka jaiñ na shyntur bad ki la shu ñiat ïa u hapoh katei ka thliew dewïong kaba ym pyndonkam shuh kaba don tang ka um, kane ka jaka ka dei kaba don ha ka thaiñ Ladrymbai, la suba ruh ba ki runar ki la leh ïa kane ka kam naduh ka miet jong ka 15 tarik u bnai jylliew.
U Superintendent of Police ka East Jaiñtia Hills District, u Shailendra Bamaniya, IPS u la iathuh ba na ka liang kiba haïing jongu (L) Kyrshan Lamurong, myn ha ka 16 tarik mynta u bnai ki la wan buh da ka ujor ejahar ha Khliehriat Police Station bad pyntip ba u bah Kyrshan Lamurong lem bad ka kali kaba u dang sei thymmai, u jah naduh ka miet 15 tarik u jylliew 2026 bad khlem wan phai shuh sha la ïing, ha ka jingwad bniah bad jingtohkit jong ki pulit la lah ban kem noh ïa ki lai ngut ki briew kiba la suba donkti kiba la tip kyrteng kum u Kumar Bermam,44 snem kyrta uba na Kokrajhar District, u Joysharon Bermam, 30 snem kyrta uba na Chirang District, Assam bad la ioh kem ïa kine ar ngut na ki jaka bapher bapher na ka thaiñ Umpleng, namar ba kine ki dei kiba shong ba sah ha ïew Cement ha Umpleng, katba ïa u Tensing Dkhar, 34 snem kyrta uba na shong Moolait Sumer pat la kem na ka jaka khlaw na Lumshnong, ïa kine lai ngut la kem mynne ha ka por dang step phyrngap ha shwa ban kynjat shai.
Dei hadien ka jingtohkit kaba bniah, kitei ki lai ngut ki la phla ba ki la pyniap ïa u bah Kyrshan Lamurong bad ki la leit ialam lynti ruh ïa ki pulit sha ka jaka ba ki pyniap bad iathuh ruh ba ka met jong u Kyrshan ka don hapoh ka thliew dewïong kaba khlem pyndonkam shuh, na ka liang ki bor pulit ki la pyntip sha ka Crime Scene Unit bad kumjuh ruh sha ka tnat SDRF bad dei ha ka por janmiet mynta ka sngi la lah ban sei ïa ka met jong u (L) Kyrshan Lamurong.
La ong ruh ba u (L) Kyrshan Lamurong u dang shu dep sei na show room ïa ka kali Espraso kaba dang thymmai bad ym pat ioh ïa ka registration number jong ka kali ruh namar u dang sei dang mynta hapoh shi bnai ïa ka kali, hadien ka jingtohkit la lap shuh shuh ba kane ka kali jong u (L) Kyrshan Lamurong ka don sha kawei ka jaka kaba hap hapoh Mawkyrwat, South West Khasi Hills bad ïa kane ka kali ym sa leit shim noh lashai da ki pulit.
Ïa ka postmortem la pyndep hajan ka jaka ba sei ïa ka met iap bad hadien ba la pyndep ïa kiei kiei kiba katkum ka aiñ la aiti noh ïa ka met ba sah sha kiba haïing.
Kiba ha ïing ki iathuh shuh shuh ba u (L) Kyrshan Lamurong u don hynriew ngut ki khun kiba dang khynnah rit bad u dei trai shong na Kseh bad poi shongkha ha Tongseng Nongkhlieh, ïa mynta hi kiba ha ïing kim pat kwah ban kren eiei bad ki shu aiti ha ki bor ka aiñ ban leh ïa kaba donkam katkum ka aiñ.