Ki briew kiba la don lypa ar EPIC dei ban pyndam noh ïa ka kyrteng jong ki na ka SIR: KHNAM

Shillong, Naitung 03: U Working President jong ka Khun Hynniewtrep National Awakening Movement (KHNAM) u la dawa ban leh eiei ïa ki nongthep vote kiba don bun tylli ki Voter ID bad dei ruh ban pyndam noh ïa ka kyrteng jong ki na ka Special Intensive Revision (SIR).
Haba kren bad ki lad pathai khubor u Bah Thomas Passah u la ong, “Ha kaba ïadei bad ki nongthep Vote ki bym dei ki riewlum trai muluk, la pynshisha bad la tip, ba bun na kine ki nongthep vote ki bym dei na kane ka Jylla ki don sa kiwei pat ki EPIC nala ki jong ki Jylla ba ki wan”.
“Ki leit thep vote hala ki jylla ba ki dei trai shnong bad ynda la wan ka elekshon ha Meghalaya, ki thep vote ruh hangne, kaba mut ba ki don 2 tylli ki EPIC, bad ka jingdon 2 tylli ki EPIC ka long be-aiñ katkum ka Election Commission of India,” u la ong.
“Ngi kyrpad ïa ka tnad ilekshon, haba pyntreikam ïa ka SIR, ba kin pynthikna ba baroh kine ki briew kiba la don lypa ïa ki EPIC nala ki Jylla ba ki wan, yn pyndam noh ïa ka kyrteng jong ki na ka SIR”, u la ong.
Ha kawei pat ka liang u Bah Thomas u la ong ba ka KHNAM kan sa thoh sha u Chief Electoral Officer (CEO) ban dawa pyrrkhing bha ïa ki jingpynshisha ban pynthikna ba ki riewlum trai muluk kin nym shah kyntait ha ka Electoral Roll halor ka jingpyntreikam iaka Special Intensive Revision (SIR).
Haba ïa kren bad ki lad pathai khubor u Bah Thomas Passah uba dei u Working President ka KHNAM u la ong,”Ngi la pule bniah ïa ki kyndon jong ka SIR , bad hooid, ngin pynpaw ïa ka jingsngewkhia lada don ka jingshah weng ne shah kyntait ki trai Jylla haka Electoral Roll”.
U Bah Thomas ula kdew ba ka jingpyntreikam ïaka SIR la leh katkum ka thup kyrteng thep vote jong u snem 2005. “Ha kaba kut ïaka SIR la pynshong nongrim katkum ka thup kyrteng thep vote 2005. Ki shim ïa ki jingtip naka jinglum jingtip kaba khatduh kaba la pynlong ha u snem 2005” la ong u Bah Thomas.
Shuh shuh u Bah Thomas u la ong, “Mynta, bun ki briew kiba dei ki nongshong shnong trai jylla, khamtam ki riewlum trai muluk, kan long kaba bakla lada ki shah weng ne shah kyntait naka thup kyrteng thep vote hadien bala pyndep iaka SIR”.
U la pynpaw ka jingsngewkhia halor ki khubor ba la aiti ban sam ïa ki phorm lum jingkhein briew (Enumeration Forms) ha ki nongmih khmat naki sengsain pyrthei.
“Ngi la iohi ïa ki khubor ba ïa ka phorm lum jingkhein briew (Enumeration Forms) la ai sha u nongmihkhmat naki sengsain pyrthei, kaba mut ba u nongmihkhmat ne ka seng sain pyrthei ki lah ban pyndonkam ïa ka na ka bynta ka jingmyntoi sain pyrthei jong ki” ula ong.
Haba ïadei bad ka 18-West Shillong constituency, u la ong ba ka constituency ka pyni ïa ka jingkylla ha ka jingbun briew.
“Ka 18-West Shillong constituency ka dei ka thain ha kaba ki riewlum trai muluk ki dei ki nongthep vote rit paid, bad kumno ki la kylla rit paid, Ka long kaba phylla haduh katta katta” ula ong.
U Bah Thomas u la ong, “Lada phai biang sha ki snem ba mynshwa, ki riewlum ki dei ki nongshong shnong kiba bun paid ha katei ka jaka, hynrei suki suki, ki riewlum ki la kylla long ki rit paid ha ka thup kyrteng thep vote”.
“Kumta ngi sheptieng ba lehse ki riewlum trai muluk kin shah weng ne shah kyntait ha ka SIR, bad lada jia kumta, kan long ka jingshah pynjot ïa ka rukom synshar ne ka sain pyrthei ha ka Jylla Meghalaya” u la bynrap.