Hukum u DC ban leit shim noh ïa ki Phom ba sam na ïingsah u MLA barim ka West Shillong

Shillong, Naitung 3 : U District Election Officer ka East Khasi Hills, ula hukum ïa u Booth Level Officer (BLO) ban leit shim noh ïa baroh ki enumeration form ba la sam ha ka 30 tarik Jylliew, 1 tarik Naitung bad 2 tarik Naitung ba sam na ïingsah jong u MLA barim ka West Shillong Constituency.
Kane ka jingbthah ka la mih hadien ka jingïoh khubor ba kynnoh ba ïa ki phorm la sam na ka ïingsah jong u MLA barim kum shibynta jong ka Special Intensive Revision (SIR) ka Electoral Roll.
“ïa kane ka jingjia la shimkhia da u District Election Officer bad u Electoral Registration Officer (ERO) ba dei khmih, bad la pynlong ruh ïa ka jingleit jurip da u AERO ha ka 2 tarik Naitung ha ïingsah une u MLA barim, ban pynshisha ïa ka jingkynnoh” ong u Deputy Commissioner Abhilash Baranral.
Hadien kane, la bthah ïa u BLO ban leit shimti biang noh ïa baroh ki phorm bala sam ha ka 30 tarik Jylliew 2026, 1 tarik Naitung bad 2 tarik Naitung, 2026.
Naduh ka 3 tarik Naitung, u AERO jong kane ka Assembly Constituency un leit ban synran dalade ïa u BLO ha ka jingsam ïa ki phorm sha ki nongthep vote kiba dei hok bad ban khmih bniah hi dalade ïa ka jingsam ïa ki phorm haduh ban da dep ka jingpynrung kyrteng” ula pynpaw.
ïa kane ka jingbthah la pynmih da u DEO hadien ka jingïakynduh bad ki seng saiñ pyrthei ha ka step sngi Thohdieng ban bishar bniah halor ka jingïaid ka SIR hapoh ka District.
Ha kane ka jingïalang, ula pyntip ba 63,731 tylli ki enumeration form la sam ha kylleng ki jaka jong ki 15 tylli ki Assembly constituency, lait noh ka Sohra Sub-Division, kat haduh ka por 5 baje janmiet jong ka 2 tarik Naitung.
ïa ki phorm na ka bynta ki Booth Level Agent (BLA) la ïoh ban pdiang tang na ki 2 tylli ki National Party bad kawei ka party na Jylla.
Haba batai shai ïa ka jingmut jong kane ka kam, u Deputy Commissioner ula ong ba “ka jingthmu ba nyngkong eh jong ka SIR kam dei ban pynrung kyrteng ïa ki nongthep vote ba thymmai hynrei ban shim jingkheiñ ïa ki nongthep vote ba la don lypa kat kumka Electoral Roll u 2025 bad ka legacy roll u 2005”.
“Kumta ka jingkynoh ba pynryng kyrteng ïa ki nongthep vote ba thymmai ka dei ka bym don nongrim” ula ong.