Halor ka jubab u Myntri halor ka jingjaboh ka lyer kaba la nang jur ha Byrnihat

Shillong, Naitung 2: Ka Hynñiewtrep Youths’ Council (HYC) ka pynrem jur ïa ka jubab jong u Myntri ka Koit ka Khiah ka jylla, u Wailadmiki Shylla, halor ka jingjaboh ka layer kaba la nang jur ha Byrnihat.
Katkum ka kyrwoh khubor na u President ka HYC u Bah Roykupar Synrem u la ong, “Ha ka por ba ka thaiñ Byrnihat ka la shah kdew bunsien kum kawei na ki jaka ba la shah ktah jur na ka jingjaboh ka layer kaba mih na ki karkhana, ka jingong jong u Myntri ba ym pat ïoh pdiang kano kano ka jingujor ba thoh sha ka Sorkar halor kane ka bynta, ka pyni shai ïa ka jingbym shim khia jong ka Sorkar ïa kane ka mat kaba ktah beit ïa ka jingim bad ka koit ka khiah jong ki paidbah”.
Ka jingjaboh ha Byrnihat kam dei satia ka mat kaba thymmai.La bun snem mynta, ki paidbah nongshong shnong ka thaiñ ki la mad ïa ka lyer jaboh, ka tdem na ki karkhana bad ka jingjulor jong ka mariang kaba mih na ka jingtreikam jong ki karkhana bapher bapher ha katei ka thaiñ, kynthup ïa ka karkhana shna ethanol. Kumta, ka long kaba ym lah satia ban pdiang ba ka Sorkar jylla kan leh kumba kam tip ne kam pat sngewthuh ïa ka jingjur bad jingktah jong kane ka jingeh, ong ka kyrwoh.
Ka HYC ka shem ba ka long kaba sngewkhia shisha ba ka Tnat ka Koit ka Khiah kan shu ap haduh ba yn da phah da ka jingujor jingthoh shwa ban leh eiei halor kane ka jingeh kaba la paw paidbah. Haba ka jingjaboh ha Byrnihat ka la long ka mat jingïakren paidbah bad kaba la mih bunsien ha ki lad pathai khubor, ka kamram jong ka Sorkar kam dei ban shu ai daw hynrei ban shimkhia mardor da kaba leh ïa ka jingwad bniah halor ka jingktah ha ka koit ka khiah jong ki paidbah bad ban pynshitom ïa ki karkhana kiba donkti ban pynjaboh ïa ka mariang.
Namarkata, HYC ka dawa ïa ka Sorkar Meghalaya ba kan tuklar mardor ia kane ka kam bad ban shim da ki sienjam kiba tyngeh pyrshah ïa kino kino ki karkhana kiba pynkheiñ ïa ki kyndon mariang bad kiba buh jingma ïa ka jingim bad jingkoit jingkhiah jong ki paidbah.
Ki paidbah Byrnihat ki don hok ban ïoh ïa ka lyer kaba khuid bad ka jingïada kaba pura na ka bynta ka koit ka khiah jong ki.Lada ka Sorkar jylla ka dang bteng ban sngap mynthi bad nym leh ei ei ïa kane ka mat kaba ktah ia ki paidbah, ka HYC kan ym banse ban leh ei ei ban dawa ïa ka hok pyrshah ïa ka Sorkar bad ïa ki karkhana kiba don bynta ha kane ka jingpynjaboh kaba la buh jingma ïa ka mariang bad ïa ka koit ka khiah jong ki paidbah.