Pynshlur u Lamphang ïa ki khun samla ka jylla Meghalaya ban ïashimbynta shitrhem ha ka kam paidbah

Shillong, Naitung 2: Ka tnad aiñ jong ka Meghalaya Legislative Assembly ha kane ka sngi Palei ka la pynlong ïa ka jingiasyllok hapdeng u Lamphang ba jong ka ïing dorbar thawain ka jylla u Thomas A. Sangma, ki dkhot ka ïing dorbar thawain ka jylla bad ki samla pule intern ha Assembly Building, Ribong Shillong.
Ha kane ka jingïakren la ïadonlang da u Deputy Chief Whip ka Sorkar u Bah Ronnie V. Lyngdoh, MLA ka kong Santa Mary Shylla, MLA u Bah Charles Pyngrope, MLA u Bah Brightstarwell Marbaniang, Assembly Secretary u Malthus Assembly S. Sangma, Adviser (Legislation) u Dr. Andrew Simons bad ki heh ophisar ka Assembly Secretariat.
Kumba 60 ngut ki samla pule intern na ki 8 tylli ki kolej ha kylleng ka Meghalaya, ha ryngkat bad ki samla pule na University of Delhi, kila ïa shim bynta ha kane ka prokram, kaba la pynlong ban ai ïa ki samla pule ban ïoh mad mar khmat ïa ka jingtreikam jong ka ïingdorbar thaw aiñ bad ka rukom synshar paidbah.
Haba kren ha ka jingïalang, u Lamphang u Thomas A. Sangma u la ban jur ba kum kine ki jingïadei ki don ka bynta kaba kongsan ha kaba pyndap ïa ka jingïapher hapdeng ka jingpule ha ka pule puthi bad ka jingsynshar kaba treikam.
U la ong ba kane ka internship ka long kham palat ban ïa ka academic exercise, da kaba batai ïa ka kum ka lad kaba don jingmut ïa ki samla pule ban mad ia ka synshar paidbah ha ka jingtreikam.U la kdew ba ka Ïingdorbar Thaw Aiñ kam dei tang ka jaka pule kaba la pule ha ki kot pule hynrei ka dei ka jaka ha kaba ïakren ïa ki jingmut jingpyrkhat, pynwan dur ïa ki polisi bad ai ïa ki jingangnud jong ki paidbah.
Haba pynpaw ïa ka jingdonkam jong ka jingiashim bynta jong ki samla ha ka synshar khadar, u Lamphang u la ong ba ki samla ki wanrah ïa ki jingmut kiba thymmai, ka bor bad ka jingpynwandur thymmai, kaba pynlong ïa ka jingdon bynta jong ki ha ka rukom thaw ain kaba donkam bha na ka bynta ka lawei jong ka jylla.
Haba pynkynmaw ïa ka jingiashim bynta jong u ha ka jingialang jong ka parliamentary seminar ha Canada kaba dang shen ha kaba la ïashim bynta da ki nongthaw ain na kumba 90 tylli ki ri, u la ai nuksa ia kawei ka nongmihkhmat kynthei kaba dang 25 snem ka rta bad u la peit bniah ba watla ka Canada kam don ka jingbuh kyrpang ïa ki kynthei ha ka iing dorbar thawain, hynrei ki kynthei ki long palat shiteng na ki nongmihkhmat ba la shah jied. U la pynshlur ïa ki samla ka jylla Meghalaya ban ïashim bynta shitrhem ha ka kam paidbah bad ban angnud ban long ki nongthaw aiñ kiba lah ban saiñ dur ïa ka lawei jong ka jylla bad ka jaidbynriew.
U Lamphang u la pynpaw ruh ba ka jingïapher jingmut ha ka por ba ïakren ha ka Ïingdorbar ka dei ka jinglong ba kongsan jong ka synshar paidbah.U la ong ba ka synshar paidbah ka hikai ïa ki briew ban burom ïa ki jingmut bapher bapher, ban ïashim bynta ha ka jingiakren kaba tei bad ban iatreilang ban wad ïa ki lad ki lynti kiba shakri ïa ka jingmyntoi jong ki paidbah.
Haba pynksan ïa ka jingriewspah jong ka kolshor jong ka Meghalaya, u Sangma u la pynpaw ba ka jingsynshar kaba bha ka dei ban don tynrai ha ka jingsngewthuh bad jubab ïa ki jingdonkam bad ki jingangnud jong baroh ki jaidbynriew ha kylleng ka jylla.
Ka jingiakren ka la pynkut da ka jingkylli bad jubab kaba sngewtynnad, ha kaba ki samla pule ki la buh ïa ki jingkylli kiba bun jait kiba ïa u Lamphang bad ki nongthaw ain kiba iashim bynta, kaba la pynlong ia ka jingiakren kaba im bad kaba don jingmut.
Haba kren ha kane ka sngi, u Deputy Chief Whip ka Sorkar u Bah Ronnie V. Lyngdoh u la ong ba kum kine ki jingïakynduh ki ïarap ban weng ïa ki jingsngewthuh bakla shaphang ka saiñpyrthei bad ai ruh ïa ki samla pule ïa ka jingsngewthuh kaba kham shai halor ka jingtreikam jong ka Ïingdorbar Thaw Aiñ bad ka rukom synshar paidbah.
Ka MLA ka kong Santa Mary Shylla ka la kynthoh ba ka jingïakren ka long kaba pynriewspah iwei ïa iwei pat, da kaba bynrap ba ki nongthaw aiñ ruh ki la ïoh ïa ki jingshem kiba kordor na ki jingïohi bad ki jingmut ba la ïasam lang da ki samla pule.