Ka jingïashimbyntalang ki seng saiñ hima kan wallam ïa ka Electoral Roll kaba khuid – DEO WGH

By Mawphor Editor On Jul 3, 2026

Electronic Voting Machine, EVM with male hand voting sign pressing button casting vote Indian election 3D illustration

Shillong, Naitung 02: U Deputy Commissioner-cum-District Election Officer (DEO) ka West Garo Hills, u Vibhor Aggarwal, u la ban jur ba ka jingïashim bynta kaba shitrhem jong ki seng saiñ pyrthei ka long kaba donkam eh ban pynthikna ïa ka jingïaid beit bad ka jingkhuid jong ka Special Intensive Revision (SIR) 2026 jong ka Electoral Roll.
Haba pynïaid ïa ka jingïalang bad ki nongmihkhmat jong baroh ki seng saiñ pyrthei ha ka DRDA Conference Hall, Tura, ha ka sngi Palei, u Aggarwal u la ong ba kum kine ki jingïalang ki long kiba donkam ban ïatai ïa ka bynta jong ki Booth Level Agents (BLAs), ban batai ïa ki rukom treikam bad ki kyndon ba dei ban bud, bad ban pynbeit ruh ïa kino kino ki jingeh kiba mih ha ka por ba pyntreikam ïa ka SIR.
“Ka long kaba donkam ban pynlong ïa kum kine ki jingïalang ha ka por ba dang ïaid ka kam, khnang ban ïatai ïa ka bynta jong ki Booth Level Agents na ki seng saiñ pyrthei bapher bapher, ban batai ïa kiei kiba dei ban leh bad kiei ki bym dei bad ban pynbeit ïa kino kino ki jingeh kiba mih ha ka por ba pyntreikam ïa ka SIR,” la ong u DEO.
Ïa kane ka jingïalang la pynlong ha ka por ba ki Booth Level Officers (BLOs) ki la sdang ïa ka jingleit rung haman la ki ïing ban lum jingtip ïa baroh ki nongthep vote kiba bit ban shah pynrung ha ka Electoral Roll hapoh ka SIR 2026. Ha ka jingïalang la donlang ruh ka Electoral Roll Observer Rikse R. Marak, ryngkat bad ki Electoral Registration Officers (EROs) bad kumjuh ki Assistant Electoral Registration Officers (AEROs).
U Aggarwal haba pdiang sngewbha ïa ki nongmihkhmat jong ki seng saiñ pyrthei u la khot ïa ki ban ai jingai jingmut halor ka jingïaid jong ka kam pynbeit Electoral Roll ha West Garo Hills. U la ban jur ba ka jingïatreilang hapdeng baroh kiba don bynta, khamtam ki seng saiñ pyrthei, ka long kaba kongsan ban pynthikna ba ka Electoral Roll kan long kaba thikna, kaba khuid bad kaba kynthup ïa baroh kiba donhok.
Katkum ka jingïathuh, haduh 178 ngut ki Booth Level Agents na ki seng saiñ pyrthei bapher bapher la thung ban ïashim bynta ha ka jingpyntreikam ïa ka SIR ha ka distrik.
Na ka liang u Additional Deputy Commissioner (Election), Nipon Hajong, u la batai ïa ki sienjam ba ka tnat Election ka distrik ka la shim shuwa ban sdang ïa ka SIR 2026. La ïoh ruh ïa ka jingkren na ka Electoral Roll Observer, Rikse R. Marak kaba la kyntu ïa kiba dei peit ïa ka kam ba kin long kiba peitngor bha ïa ka kam naduh kaba sdang haduh kaba kut.