Ka thup kyrteng ki nongthep vote ba kyrpang na ka bynta ka GHADC ka nangïaid shaphang

Tura, Naitung 2: Ka jingdawa kaba la slem bha ban don ka thup nongthep vote kaba kyrpang na ka bynta ka Garo Hills Autonomous District Council (GHADC) ka la ïaid shakhmat, ha kaba ka committee kaba la thaw ban bishar bniah ïa kane ka kam ka la aiti ïa ka kaiphod jong ka sha u Chief Executive Member (CEM) u Dhormonath Ch. Sangma ha ka sngi Palei.
Ïa kane ka kaiphod mynta yn buh ha khmat ka Executive Committee jong ka GHADC ban bishar bniah shwa ban wanrah ha ka dorbar ban wan jong ka Council, kaba la khmih lynti ba kan long ha kaba kut jong une u bnai. Lada mynjur, ka lah ban plie lad ïa kawei na ki jingpynkylla ba kongsan tam na ka bynta ki Autonomous District Council ha Meghalaya.
Haba kren u CEM u Dhormonath Ch. Sangma u la pynpaw ka jingshaniah ba katei ka jingtyrwa kan ioh ïa ka jingmynjur jong ka ïing dorbar.
“Nga sngew kmen ba ka committee ka la aiti ia ka kaiphod.Mynta lah ban shim ïa ka kam kaba donkam, nga don ka jingshaniah kaba pura hapoh ka ïing dorbar ba ïa kane yn mynjur ha ka dorbar ban wan”, u la ong.
Da kaba batai ba ka dei ka jingangnud kaba la slem bha jong ki paidbah, u CEM u la ong ba ka committee ka la pyrshang ban pynïaid shakhmat ïa kane ka mat.
Kumba ka long mynta ka elekshon sha ki Autonomous District Council ka long da kaba pyndonkam da ki thup kyrteng ba la pynkhreh na ka bynta ka elekshon Assembly. Ki jingdon la ka jong ka thup kyrteng thep vote jong ka District Council kan ïada kham bha ïa ki jingthmu jong ka riti synshar ka Khyrnit kaba Hynriew da kaba pynthikna ba ki nongmihkhmat ba la shah jied ka long ban iada ïa ki aiñ riti dustur, ka hok khyndew bad ki tnat treikam tynrai la jied lyngba ka rukom jied nongmihkhmat kaba kyrpang.
Ïa kane ka jingdawa la kyrshan da ki phew snem da ki ki seng bhalang bad ki kynhun riewlum ha kylleng ka Garo Hills, kiba kynthoh ba ka jingpynbna ba ka jingdon la ka jong ka thup nongthep vote kan pynskhem ïa ka jingsynshar jong ka District Council bad kan pynskhem ïa ka jingsynshar hi jong ki trai ri trai muluk.
Da kaba aiti mynta ïa ka kaiphod jong ka committee, ka jingpyrkhat ka leit sha ka Executive Committee bad hadien kata sha ka Council, ha kaba la khmih lynti ba ki dkhot kin ïamir jingmut halor ki jingai jingmut ha ka dorbar ka ban long ha u bnai Naitung.