Nongstoiñ, Naitung 01: Ki nongrep ka thaiñ Nongstoiñ kiba ju trei shitom bad da ka rep ka riang, ki la pynpaw ïa ka jingsngewdiaw namar ka jingwan hap duna palat u slap mynta u snem, kata lada ïa nujor bad kiwei pat ki snem. Ka jingduna palat ka jinghap slap ka la pynlong ruh ïa kiba bun hi paidbah nongrep ba kim banse ban thung dier por tang namar ba ka por kam shah shuh bad ka aïom ka lah jan dier.
Ha ka ka jingïakren bad u nongthoh khubor, u bah Khrawkupar Kharit bad u bah Hanles Khardewsaw kiba na ka shnong Siejlieh Nongstoiñ West Khasi Hills District, kiba dei ruh ki nongrep kiba ju thung ju rep man la u snem, ki la pynpaw ka jingbynñiaw kaba jur bad ong ruh ba ym lah ban tip kaei ka ban jia hadien, tangba kane ka jingduna palat ka jinghap slap ka la ktah lypa ïa kiba bun ki nongrep kba ha ka thaiñ.
“Ha ka jingshisha man la u snem la ju thung ïa u Kba ha ki tarik ba sdang jong u bnai Jylliew. Hynrei mynta ka kynti wat ban puh ruh ym pat dep, tang namar ka jingduna palat ka jingwan u slap. Don ruh kiba dang bteng ïa ka ban puh pynthot wat haba la sdang ban kut wat u bnai Jylliew, namar ki la nang ap khmih lynti ïoh un ther u slap katkum ka aïom”, ong u Bah Khrawkupar.
Haba kylli u bah Hanles u la ong, “U khaw ba da thung hi bad ba da trei shitom dalade u pher shibun eh, namar ngi ïoh ban bam ïa u Khaw nalor ba u dei ruh u khaw u ba duna ka jingai dawai bad u kham bang wat haba bam khlem jingtah, pynban ïa u Khawkhar da lei lei yn ym lah ban bam khlem jingtah”.
U la bynrap ruh da kaba ong, “Lada pynmlien ban thung ban rep kan pynmyntoi ym tang ïalade hynrei wat ïa kiwei ruh. Kan pynsuk ruh lada jia ka jingwan lyngshop biang ka khlam kumba la jia ha ka por Corona. Ngi dei ban trei shitom hi ym ban ym ïabeh than ïa u Khaw nongwei u ba bun tang ki dawai bad u bym shngaiñ ban bam”.
U Bah K.Marweiñ na Lawse u la ong ba mynta u snem ruh ka jinglong jingman ka suiñ bneng ka ïa syriem bha ïa u snem 2023, u snem u ba ka jingrang tyrkhong ka la jur haduh katta katta, haduh ba ki um ki wah ki la sdang sa ban rngad, ki pynthor ki hali jong ki nongrep ki la pdang lut namar haduh ka taiew nyngkong u bnai Jylliew ruh ki pynthor ki hali kim don um satia.
U la ong ba ha ki snem ba mynshuwa eh kane ka jingrang tyrkhong ka ju jia tang tyngkhat eh kata ruh tang haduh u bnai Jymmang hynrei kumba ka long mynta u snem te ym pat ju don satia.
Nalorkata u la ong ba ba kane ka jingkylla syndet jong ka mariang ka lah ban dei na ka jingbym kheiñ kor shuh jong ki briew ïa ki khlaw ki btap ha kaba ki la pynjot pathar da kaba thang rnga bad pom dieng.
