Shillong, Lber 23 : Ka Bharatiya Janata Party (BJP) ka kyrpad ïa ki paid nongshong shnong ka jylla Meghalaya ba kin ai jingkyrshan ïa ka party ha ka election ML:A 2023.
“ Ngi kyrpad ïa ki paidbah jongka jylla ba ha kane ka kynti kin sngewbha ban ailad ïa ka BJP namar ka party ka thrang ban ïoh thaw sorkar ban wanrah ïa ka roi ka par hapoh ka jylla” ong u President ka Party u bah Ernest Mawrie.
U la ong ba ka BJP ha ka election ba dang shu dep shen ka la jop saw tylli ki jylla na ki san tylli kiba ïaleh ïa ka election da kaba ka ïoh ban synshar hi da lade. “ Balei ki briew ha kitei ki jylla ki kyrshan ïa ka BJP namar ki ïohi ba ka party ka dei kaba trei ban wanrah ïa ka roi ka par” ong u bah Mawrie.
U la ïathuh ha ka jingïalang ba la long ha ka Sngi Ba Ar la shim rai ban pynkhlaiñ ïa ka party na ka bynta ka election 2023 bad ban thaw noh ïa ka Election Manifesto Committee ha kaba baroh arngut ki MLA ka party kin ïadon ryngkat ha katei ka committee.
“ Ngin don ar bynta ka manifesto, kawei na ka bynta ki trai ri trai muluk bad kawei pat na ka bynta jong baroh lang bad kumjuh ruh ki mat kiba ïadei bad ka jylla” ong biang u bah Mawrie.
Ula ïathuh ba ka party kan ïai bud dien ïa ki skhim ba la mang da ka sorkar NDA na ka bynta ka jylla kata naduh ka JJM, Saubhagya, PMGSY, surok bad umdih.
Ha ki por ba mynshwa ïa ki surok lyngba ka PMGSY ym shym la shim khia namar la shna tang 1 haduh 2 Km ei ei bad la sangeh ne pynsahteng noh hynrei ha kane ka sorkar NDA hapoh ka jingïalam u Myntri Rangbah duh u Narendra Modi la bthah ïa ki jylla kynthup ïa ka Meghalaya ba ki dei ban pyndep 17 Km ka jingshna surok ha ka shisngi.
Haba phai sha ka jingkiew ka Assam ha ka roi ka par bad pule puthi namar naduh ki Medical College, Engineering College ka la ïoh, u bah Mawrie u la ong “ Ngi ruh ngin phai khmat sha kine lada ki paidbah ki ailad bad kyrshan ïa ka BJP ban ïoh thaw sorkar”.
U la ïathuh ba ka sorkar jylla ka la hap thung jingtohkit halor ka jingpyntreikam ïa ka skhim Saubhagya namar ka jingïeng pyrshah bad dawa ka BJP.
