Pyntikna u CEM ka JHADC ban pyndep noh ïa ka ‘Clan Bill’ kaba ïadei bad ka jingshimjait na ka Kmie

Jowai, Jylliew 29: U Chief Executive Member (CEM) ka Jaiñtia Hills Autonomous District Council (JHADC) mynta ka lah sngi U Blei 29 tarik u Jylliew uba pyntikna ïa ka Draft jong ka “Clan Bill” yn pyndep noh ïa ka hapoh kine ki kyndiat bnai ban wan.
Shuh shuh ula ong naka liang EC kala dep ban pynkhreh ïaka bad shen yn sa pyllait noh da ka jingïahunlang jong baroh ha ryngkat ka Dorbar ki Waheh Kur Ri Jaiñtia khlem kano kano ka jingïapyrshah, ïa kino kino ki jingduna yn sa pynbeit lang na ka bynta ka jingpynkhlaiñ ïa ka jinglong tynrai jong ka riti Dustur.
Halor kane ka jingdawa ka Dorbar ki Waheh Kur Ri Jaiñtia ban thaw noh ïa ka aiñ ha kaba ïadei bad ka jingshim jait na ka kmie, u CEM ula ong kum ka Executive Committee kala dep ban ïaid lynti la slem bha namar kam dei ka kam kaba suk bad la thaw ïa kawei ka Committee kaba tip kim ka Role Advisory Committee kaba peit ïaka Clan Bill hynrei kane ka Committee kam shem la lah ban pynïoh ïa ka report sha ka EC.
Khnang ban pynïaid shaphrang ïa kane ka kam ka EC kala pynbeit ban aiti sha ki legal Expert bad ban draft ïa ki aiñ ki kyndon kiba ïadei bad ka jinghiar pateng na ka jait jong ka kmie ym na ka jait kpa, la ong u CEM.
Ula pyntip na ka liang ka Dorbar ki Waheh Kur Ri Jaiñtia kila pyrshah ïa ka jingbymhun ïa ki kur kiba dep ban notified da ka Council kiba kynthup ïa ki jait Baite bad Sakachep tribe, kiba ym dei satia ki indigenous namar ki dang ai jait sha u kpa bad na ka liang ka Customary Law Committee kan sa shong pyrkhat sani bha ïa ka jingkwah kitei ki jait Baite ban ithuh ïaki kumba long kiwei.