Duna ka jingdon ki kynthei ba kiew ha ka liang pule ki kyrdan ba shalor: Hema Nayak

Nongstoiñ, Jylliew 28: Ka District Administration West Khasi Hills, ha ryngkat ka jingïatreilang bad ka District Social Welfare Office lem bad kiwei pat ki tnad sorkar, ha ka 26 tarik ka la rakhe ïa ka sngi pyrshah drok ryngkat ka jingai jinghikai, kaba la pynlong ha St. Francis D’Assisi College, Siejlieh.
Ka Hema Nayak, IAS, Deputy Commissioner West Khasi Hills, ka la don ryngkat ha kane ka prokram kum ka kongsan, katba na ka liang ka kong D.Pakynteiñ, District Social Welfare Officer West Khasi Hills, ka la ai ïa ka jingkren pdiang ryngkat ka jingpynshai halor kane ka sngi pyrshah drok, kumno ban pynkhlaiñ bad ban ïatreilang ban ïakhun, khnang ban wanrah ïa ka imlang sahlang kaba lait na u drok.
Ka la ong ba ka jingrakhe ka pynkynmaw sha baroh halor ka jingdonkam ban ïasnohktilang naduh ki bor sorkar, ki bor shnong, ki skul pule bad ki longïing longsem, ban ïada ïa ki jingdih bad jingmlien kiba sniew, ban wanrah bad pynshai khamtam ïa ki samla ba dang khie dang san.
Haba ai jingkren kum ka kongsan, ka Hema Nayak IAS, ka la pynpaw halor ka jingdonkam jong ka Nasha Mukt Bharat Abhiyaan, khamtam eh ha ka jylla Meghalaya kaba don ha ka khambun eh ki nongshong shnong kiba dang khie dang san ha ka ri hi baroh kawei.
Ka la ong ruh ba ïa ka kam dih drok dei ban peit ym tang ba ka dei ka kam sniew kam kyrni, hynrei ban shimkhia ruh namar ka ktah lut ha baroh ki liang, naduh ka koit ka khïah, ka pule puthi, ka lad ban ïohkam ïohjam bad baroh ki kam kiba ïa dei bad ka jingkyntiew ïa ka imlang sahlang.
Ka la ong ruh ba ka jingmlien ba sniew ka lah ban long kawei na ki daw jong ka jinghiar ka pule puthi ha ki kyrdan kiba kham shalor ha ka jylla bad pynpaw ruh ïa ka jingma halor ka jingnang kiew ka jingpang HIV ha ka jylla.
Ka Deputy Commissioner ka la ong ba ka District Administration, lyngba ki tnad sorkar bapher bapher, ka la ïai pyrshang ban thaw ki lad ki lymti ban ïakhun pyrshah bad ban pynduna ïa ka jingdon kiba kyrni ha ka jingdih drok ha ka district. Ka la ïai pyrshang ruh ban wanrah pat ïa kito kiba la kyrni da kaba ai ïa ki jinghikai sha ki ryngkat ki bor shnong.
Haba ban jur halor ka jingdonkam jong baroh ban ïatreilang ban ïakhun pyrshah ïa u drok, ka DC ka la ong ruh ba baroh ki nongshong shnong la ka long ha shnong ki kyntoit shnong bad baroh ki liang, ki donkam ban ïatreilang ryngkat ban ïakhun pyrshah ïa kane ka kam. Ka la kyntu kyrpang eh ïa ki khynnah skul ba kin long ki nongrah ktien bad ban pynpaw sha ka pyrthei halor ka jingma jong ka jingpyndonkam drok ha ka District baroh kawei.
Haba kren halor ka Beti Bachao Beti Padhao, ka la ong ba watla ka jylla Meghalaya ka dei kaba ai jait sha ka kynthei, hynrei ka jingdon ki kynthei kiba kiew ha ka liang kiba pule ha ki kyrdan kiba kham shalor ka duna haduh katta katta, watla ha ka ki long kiba tyngshaiñ bha ha ka por shong skul lane ha ki secondary level.
Ka la pynpaw ka jingangnud bad khmih lynti ban ïohi khambun ki kynthei na kane ka District, ha ki kyrdan pule kiba kham shalor, ba kin long ki nongïalam ruh ha ki kyrdan bapher bapher. Ka la ong ba ka jingmut kaba kongsan jong ka ‘Beti Bachao Beti Padhao’, kam shym mut eh ba ki khynnah kynthei kin leit sha skul, hynrei ban ai bor ïa ki ban kiew ha baroh ki liang jong ka jingim, ba kin long ki nongïalam kiba skhem jingmut, ki kynthei kiba khlaiñ ban shim ïa kano kano ka rai bad ban ai ïa kaba bha tam ruh sha ka imlang sahlang.
Ha ka porkram ïatai lane ‘Technical session’, ka kong D.M.K.S. Shadap, Chief Judicial Magistrate, ka la ai ïa ka jingkren halor ki kyndon aiñ kiba ïa dei bad ka kam drok. Ka la pynshai bniah ruh halor ki mokotduma kiba la register case hapoh ka kyndon aiñ ‘Narcotic Drugs and Psychotropic Substances (NDPS) Act’.
Nangta, ka la batai ruh halor ka jingpyntreikam ïa ki aiñ kiba ha kaba ïakhun pyrshah ïa u drok bad ki jingmlien ba sniew.Ka la ai mynsiem sha ki paidbah nongshong shnong khamtam ki samla, ba kin long kiba tip halor ka jingpyntreikam ïa ki kyndon aiñ kiba ïa dei bad u drok.
Kiwei kiwei kiba la ai jingkren pynshai ha kane ka sngi ki long u T.R. Marak, Circle Inspector, u ba kren halor ka NDPS Act, ka kong A. Lyngkhoi Clinical Psychologist, South West Khasi Hills, kaba la pynshai halor ka jingktah ka bor pyrkhat ha u briew u ba dih drok bad ïa ka imlang sahlang.
Ïa kane ka prokram ka pynïaid da u Bah A. Kynsai Kharwaniang, District Mission Coordinator (DMC), u ba la pynpaw ïa ki kyntien ai khublei sha baroh kiba la donlang ha kane ka sngi khamtam eh ki kongsan kiba la don ha kane ka sngi ha St. Francis D’Assisi College, ki nonghikai, ki khynnah skul bad kiwei kiwei.
Ka prokram ka la long kaba shongshit da ka jingïashimbynta shitrhem jong ki khynnah pule jong ka College. Katba na ka liang ka Deputy Commissioner ka la shim ruh ïa ka bynta ban sam ïa ki khusnam bad ki syrnod sha ki nongjop ha ka jingthoh slogan, poster bad jingïakop dro dur.