Kwah ka AMCSA ban phiah ïa ka song pisa ha ka tender ban tei ïa ka State Veterinary Hospital

SHILLONG, Jylliew 26: Ka All Meghalaya Contractors and Suppliers Association (AMCSA) ka la kyntu ïa ka sorkar jylla ban pyndam noh shwa ïa ka tender kaba la khot na ka bynta ban shna ïa ka state veterinary hospital ha Upper Shillong bad ban khot tender biang lyngba ka split package system, da kaba ong ba ka rukom treikam kaba mynta ka khanglad ïa ki local contractor.
Halor kane ki nongialam ka AMCSA hapoh ka jingialam u Bah Emanuel Syiem Malniang uba dei u General Secretary kila leit ban ïa kynduh ïa u myntri sorkar ba peit ïa ka tnad Animal Husbandry and Veterinary u Bah Sanbor Shullai.
Haba kren ha ki lad pathai khubor hadien ba la dep ban kynduh ïa u Myntri Sorkar u Bah Emanuel u la ong ka jingkynduh ka jong ki ïa u myntri sorkar kadei halor ka jingkhot ïa ka tender ban tei ne shna ïa ka state veterinary hospital ha Upper Shillong kaba dei ruh ka project kaba la kot haduh 62 klur tang ha kawei ka package.
“Ngi la kynduh ïa u myntri sorkar bad kumjuh ruh ïa u Director jong ka tnad Animal Husbandry and Veterinary ban phah phiah ïa ki side development work ym ïa ka building hynrei ngi kren beit tang halor ka side development work namar ba katkum ka jingioh jingtip ba 15 klur kadei ka building, 30 klur na ka bynta ki tiar ki tar jong ka rukom sumar ne ki medical equipment 17 klur ka side development work ba kynthup lang ïa ka quarter ki nongtrei” ong u Bah Emanuel.
Shuh shuh u Bah Emanuel u la ong, “Ha ka jingïakynduh ngi ong ba phin sangeh shwa ïa kane ka tender bad phah shwa ban phiah khang ba kiwei kiwei ki congtractor kiba register lang hapoh ka tnad kin ioh ban ïa shim bynta lang”.
Na ka liang u Myntri Sorkar te u la ong ba ka rai baroh ka shong ha ka tender committee bad ka long kaei kaei ba sngewlyngngoh namar ba kadei ka sien ba nyngkong ban ioh sngew kum kata namar ba kam ju don kaba kum kata ba u myntri sorkar ba peit ïa ka tnad u deii ma u uba long ha khlieh duh ban shim ïa ka rai bad lada um lah ban shim rai kan pynlong pat ïa ngi ban pyrkhat da kawei pat ka lynti, ong u Bah Emanuel.
U Bah Emanuel u la pyntip ba u myntri sorkar u la shu ong ban phah sha u Principal Secretary ba dei peit ïa ka Animal Husbandry and Veterinary te ngin shu ap shi sngi ar sngi bad hadien kata ngin sa peit kaei pat ka sienjam ban gin namar ba haduh mynta ngi sngewthuh kam don ka jingkular bad kan ym long hi ruh bad ngi hap ban shim da kawei ka lynti.
Ïa kane ka tender la khot mynta u bnai Jylliew bad ka por ban kut kan dei ha ka 2 tarik u Naitung bad 3 tarik pat kadei ka sngi ban thep.
Halor ka jingbym phiah ïa ka song pisa jong kane ka project u Bah Emanuel u la ong, “kum kane ka lah jia bunsien bad nga tharai ba kane ki lah don lypa ki briew jong ki bad kadei kata hi ba ki khot ïa kane ka package khnang ba kiwei kiwei kin ym lah ban shim bynta bad kan poi beit tang sha u wei u briew”.
Haba pynshai halor kane jingkynnoh jong ka AMCSA u myntri sorkar u Bah Sanbor Shullai u la ong, Kum kata kan don satia namar ba lada lah don ki briew lajong kin ym khot tender re bad kane ka dei ka open tender bad mano mano lah ban ïa shim bynta kiba dei ki contractor kiba lah register katkum ki jingdonkam lane ki kyndon ba lah buh lada ki biang ki lah ban thep bad ïa shim bynta bad ka shong pat ha ka tender committee ban peit bad rai ïa ki kot ki sla kiba biang.