Shillong, Jylliew 26: Ka HYC Dangar Balat Border Circle mynta ka 25/06/2026, ha ka jingïalam samla Marius Nongsiej President bad Amshelties Shylla secretary, la pynlong ïa ka Sier Lapalang Operation ban leit khynra trading licence bad work permit lane labours licence ïa ki bar jylla ha ki thaiñ Border kum ha ïew Balat ha Dangar hat bad kiwei de ki jaka ha thaiñ Dangar, Balat.
Ha ka jingleit khynra trading licence, work permit lane labours licence jong ka seng ka la shem bad dap da ka jingsngew lyngoh haba tang kawei ka dukan ruh ym don ba biang ki kot ki sla, ki don ki kot ki sla tang kiba lah kut lut ka por ym shym la don ba lah dep pynthymmai ïa ki trading licence bad work permit ki jong ki.
Ka seng ka sngew ban ai jingmut ïa ka Executive committee jong ka District Council lyngba u Executive Member ba peit ïa ka tnad khaïi pateng ba ki dei ban shim khia ha kaba ïadei bad kane ka bynta.
Kum ka seng la phah ka kyrwoh ba shai sha ki paidbah ka dong ka thaiñ, ka ri bad ka jaitbynriew bad kumjuh ruh sha ka EC ka KHADC lyngba u EM ba dei peit ïa ka tnad khaïi pateng, ba kum ka seng ki la ai por la kumno kumno hapoh shibnai ban pyndep ïa ka jingleit pynthymmai ïa ki Trading Laisen bad ka work permit.
Na ka liang ka HYC ka la ong ba lada kim lah ban pyndep ïa ka jingleit pynthymmai ïa ki trading licence bad work permit jong ki ha ka por ba lah buh ka seng hi kan shim da kiwei pat ki sien jam ba kham tyngeh.
