Jowai, Jylliew 26: Ïa ka prokram eksamin ïa ki nongpang klongsnam kaba tip kum ka ‘Congenital Heart Disease Screening Camp 2026’ kaba ar sngi 23 & 24 tarik u Jylliew la pynlong ha District Early Intervention Centre (DEIC), Loomkhliehriat, Panaliar Jowai, ha ryngkat ka jingïatreilang bad ka Amrita Institute of Medical Science, Kochi.
Ha kane ka Camp haduh 186 ngut kiba la wan phah eksamin na ki ar tylli ki District East bad West Jaiñtia Hills. Ïa kane ka kynhun eksamin la ïalam da u Dr. Mahesh bad u Dr. Amit ha ryngkat ka jingïarap u Dr. M. Swet na ka MCH.
Na ki 186 ngut ki briew kiba la shah eksamin, 43 ngut la jied ban shah sumar, katba 62 ngut la ai jingmut ban bishar bniah hadien hynriew bnai haduh shisnem.
Na ka liang kitei ki kynhun Specialist ka Amrita Institute of Medical Science, Kochi kila leit jngoh ruh ïa ka Hospital jong ka Maternal and Child Health (MCH) ha kaba ki la peit bniah bad bishar bniah ïa ki khyllung ba dang kha bad ïa ki khyllung ba la shah sumar ha ka Special Newborn Care Unit (SNCU), Pediatric Intensive Care Unit (PICU) bad Intensive Care Unit (ICU).
Kiba don jingpang klongsnam kiba pynrung kyrteng ha kane ka screening camp la bthah ïa ki ban shah sumar kaba khlem jingsiew hapoh ka prokram RBSK.
Na ka liang ki ophisar na ka DEIC ki la pyntip ïa ki 43 ngut kiba la jied ban shah sumar ha kane ka camp yn phah sumar ïa ki sha Kochi bad baroh ki jinglut jingsep kynthup ha ka leit ka wan kim donkam jingsiew ei ei.
