Aibor ka Education Deptt ha ki DC ban peit ïa ki skul halor jingkiew ka khlam COVID

Shillong, Naitung 20 : U Myntri ka tnad Pule Puthi ka sorkar jylla, Bah Lahkmen Rymbui ha ka sngi Balang u la ong ba watla ka jingdon ki briew kiba ïabit thymmai ïa ka jingpang COVID ka la nang kiew ha ka jylla hynrei kam pat don jingma pat ïa ki skul kiba don ha ka jylla.
“Ngi peitngor ïa ka jinglong jingman bad ngi la dep ruh ban phah ïa ka jingpyntip ba ki Deputy Commissioner ki lah ban shim ïa ka rai ha ki distrik jong ki katkum ka jinglong jingman ha kito ki jaka,” ong u Myntri haba kren bad ki lad pathai khubor.
Katkum ka jingong jong u, tad haduh mynta kam pat don kano kano ka jingthmu na ka liang ka sorkar ban phah khang lut ïa baroh.
Lah ban kdew hangne, ba tang ha kane ka sngi Balang ki la don haduh 102 ngut ki briew kiba ïabit thymmai ïa utei u khniang jingpang ha kaba ki distrik ba shah ktah jur ki dei ha West Garo Hills kiba poi haduh 36 ngut bud pat sa ka East Khasi Hills da ki 34 ngut.
Kumba long haduh mynta, ka jingdon ki briew kiba ïabit ïa utei u khniang jingpang ha ka jylla ka la kiew biang sha ka 358 ngut ha kaba kham bun na kitei kiba ïabit thymmai ki dei na West Garo Hills bad ruh na East Khasi Hills.