Wat ap haduh ba kan da jia ki jingpynmynsaw ne kaba sngewsih ïa ki paidbah: SSSM

Mawkyrwat, Jylliew 23: Ka Seng Samla Shnong ka la lap ba ha ka jaka buh ïa uwei u transformer ha shnong Mawkyrwat ka la kylla long kum ka pung dohkha hadien ba ka um ka la tap lut ïa katei ka jaka, bad dei halor kane kaba la pynlong ïa ka Seng Samla Shnong bad ki paidbah nongshong shnong ban sngewkhia halor kane ka bynta khamtam ïa ki khyllung khynnah bad ki nongïaid nongïeng kiba pyndonkam ïa katei ka surok.
Kumta, halor kane ka bynta, ha ka sngi baar ka 23 tarik u Jylliew, 2026 ka Seng Samla Shnong Mawkyrwat ka la leit jurip bad la ïohi ba ka um ka la lang bad sahkut ha ka jaka ba don u transformer, kaba lah ban wanrah ïa ka jingma na ka bording elektrik lada ym shimkhia ban pynbeit mardor ïa kane ka jingeh.
Halor kane ka bynta, ka Seng Samla Shnong Mawkyrwat hapoh ka jingïalam u Bah Kitborsing Lyngdoh uba dei u President, ryngkat bad u Bah Kitkhia Nongbri, u Bah Downing Marweiñ bad u Bah Wankitbok Nongkynrih, Publicity Secretary ka Seng, ki la pynpaw ïa ka jingsngewkhia kaba jur halor kane ka jinglong jingman kaba ki ki la lap da la ki jong ki khmat.
Kumta, ka Seng Samla Shnong ka la kyntu jur ïa ka tnat bording jong ka Mawkyrwat Division ba kan shimkhia bad leh ei ei noh mardor ban pynbeit ïa kane ka jingeh khnang ban lait na kano kano ka jingjia ba sngewsih ne jingmynsaw ïa ki paidbah. “Ym dei ban ap haduh ba kan da jia ki jingjia ba sngewsih shwa ban shim ïa ki lad jingïada kiba donkam”, ong ka kyrwoh.
Shuh shuh, ka Seng ka la kyrpad ïa ki paidbah, khamtam ïa ki khynnah, ba kin kiar na katei ka jaka haduh ban da dep pynbeit ïa ka jingeh da ki bor ba dei peit.