Nongpoh, Jylliew 23: Namar ka jingslem jong ka jingpyndep ïa ki projek Jal Jeevan Mission (JJM) ha kiba bun ki shnong jong ka thaiñ Baridua, ka Federation of Khasi Jaintia and Garo People (FKJGP), Baridua Them Marwet Circle, ka la leit ïakynduh ïa u Bah U. Kurbah, Executive Engineer ka tnad Public Health Engineering (PHE), Nongpoh Division, ban dawa ïa ka tnad ba kan shimkhia bad pynsted noh ïa ki kam kiba dang sah.
Ïa kane ka jingïakynduh la lamkhmat da u President ka Circle, Bah Denis Nongrum, bad u Secretary, Bah Allan Donald Sohpdang, ryngkat bad kiwei pat ki dkhot ka seng.
Hadien ka jingleit kynduh, u Bah Allan Donald Sohpdang haba kren sha ki lad pathai khubor u la ong ba ka seng ka la ïoh bun ki jingujor na ki paidbah halor ka jingbym pat pyndep ïa ka skhim JJM naduh u snem 2023. U la ong ba ha kiba bun ki jaka, wat ki pipe um ab dei ban pynpoi sha ki longïing dang sahkut haduh mynta.
U la bynrap ba watla ka sorkar ka la wanrah ïa kane ka skhim na ka bynta ka bha ka miat jong ki paidbah, hynrei kiba bun ki longïing kim pat ïoh satia ïa ka umbam umdih lyngba katei ka projek. Kane ka la pynlong ïa ki paidbah ban mad jingeh bad ban dang shaniah ha kiwei pat ki tyllong umbam umdih.
Na ka liang ka FKJGP ka la kyntu ïa ka tnad PHE ba kan shim mardor ïa ki sienjam kiba donkam ban pyndep noh ïa baroh ki kam kiba dang sah khnang ba ki paidbah kin ïoh ïa ka jingmyntoi kaba pura na ka Jal Jeevan Mission.
Katkum ka jingïathuh jong u Secretary ka seng, u Executive Engineer ka PHE u la kubur ba dang don ki bynta jong ka projek kiba ym pat lah ban pyndep bad u la ai ka jingkular ba ka tnad kan pynkloi ïa ki kam kiba dang sah khnang ban pynurlong ïa ka jingthmu jong kane ka skhim.
Ka FKJGP ka la ong ruh ba kan nang ïai buddien ïa kane ka mat bad kan peitngor ïa ka jingïaid shaphrang jong ki projek khnang ba baroh ki longïing kiba dei hok ban ïoh jingmyntoi kin ïoh ïa ka umbam umdih kaba biang bad kaba neh.
