Nongstoiñ, Jylliew 23: Ha ka step synïa jong kane ka sngi hat majai lah ka 23 tarik Jylliew ki runar ki bym lah ban ithuh durkhmat ki la prong ïa ka jaka shna taïar jong u Bah Pynshlurlang Marweiñ kaba don ha ka shnong Ktiehthawïar harud ka surok Rwiang Langja West Khasi Hills ha kaba ki la rongei bad tuh ïa ki taïar kali kiba u la dang shu dep shna.
U Nah Marweiñ haba pyntip ha u nongthoh khubor u la ïathuh ba ka jingshah prong jong katei ka jaka shna taïar jong u ka la jia bun sien ha kaba ki runar ki la rongtuh ïa bun jait ki tiar kali kiba shong dor da ki phew hajar.
Nalor kata u la ong ruh ba hadien ba ka jingshah prong bun sien ha ki runar u la pyndait noh da ka CCTV bad ïa ka dur jong kitei ki runar kiba wan prong ha ka step synïa jong kane ka sngi hat majai la ïohi ha ka CCTV footage bad ïa ka kali ba ki wan ruh la ïohi ba ka dei ka rong lieh tangba ïa ka registration number jong katei ka kali ym lah ban ithuh.
Haba kylli la u la leit buh ejahar ne em sha ki pulit halor katei ka jingshah prong jong ka jaka shna taïar u la ong ba mynta u dang pynkhreh ban copy ïa ka CCTV footage bad un sa leit ban mudui da ka ejahar da kaba rah lang ïa katei ka dur khih ba la ïoh ring lyngba ka CCTV khnang ba ki pulit ki kham suk ban bishar bniah bad ban ithuh ïa kitei ki runar.
