Yntei noh ka Sorkar ïa ka Megh House ha Vellore ban ïoh jaka sah kiba leit shah sumar pang sha CMC

Shillong, Jylliew 22 : Ka Sorkar Jylla kan sa tei sa kawei ka Meghalaya House ba thymmai ha Vellore ban pynbiang jaka sah ïa ki nongshong shnong ka Jylla kiba leit shah sumar ha CMC Vellore, ong u Myntri ka Tnad General Administrative Department Bah Sosthenes Sohtun ha ka sngi Nyngkong hadien ka jingleit jurip ïa ka Jingtei ba don mynta.
U Myntri, ba la synran da u Commissioner & Secretary, OSD bad ki Nongtrei ka Meghalaya House Bellore, ula leit jurip ïa ka jingtei ba don mynta bad pynïaid ïa ka jingïalang bishar kam ban shim jing kheiñ ïa ka jinglong jingman jong kane ka jingtei bad ban ïapyrkhat ruh ïa ki jingdonkam ba hadien habud.
“Ngi la pynlong ïa ka jingjurip bad ka jingïalang bishar kam ban shim ïa ka rai halor ka jinglong jingman ka Meghalaya House ha Vellore” ong u Bah Sosthenes.
Haba batai ïa ka jingtei ba mynta kum ka “jingtei kaba la rim bha” kaba don tang kumba 30 kamra, u Myntri ula ong ba kane ka jingtei ka la ai ka jingshakri ïa ki nongpang na Meghalaya kiba leit wad jingsumar sha CMC Vellore la bun bun snem.
Ula pynpaw ruh ïa ka jingnang kiew ha ka jingdon ki nongpang kiba leit wan sumar sha Vellore. “Ka jingdon ki nongpang ba leit wad jingsumar kala kiew na u snem sha u snem. Tang ha u 2025, ngi la tam ïa ka 212 ngut ki nongpang” ula ong bad bynrap ba ki nongpang bad ki nongsynran ki la pynpaw ïa ka jinghun bad ka jingai jaka sah bad ka jingshakri.
U Bah Sosthenes ula ai ruh ïa ka jingïaroh ïa ki jingkyrshan jong ka Sorkar Jylla. “Nga kwah ban ai khublei ïa u Myntri Rangbah Conrad K Sangma bad ka Sorkar Meghalaya namar ka jingpynbiang ïa ki kali khlem ka jingsiew na ka bynta ki nongpang. Ngi la buh ïa ki kali ban kit ïa ki nongpang sha hospital ban ïoh jingsumar. Kane kala ïarap bha ïa ki ban lait ka pynlut ha ka leit ka wan” ula ong.
Haba kdew ïa ka kaiphod ba dang shen jong ki Engineer ka PWD, u Myntri ula ong ba ka jinglong jingman jong ka jingtei ka la tor bha. “Kat kum ka kaiphod ki Engineer ka PWD, ka rukom long jong ka jingtei hangne ha Meghalaya House, Vellore ka long kaba la rim bha bad ngi hap ban shim ïa ka rai” ula pynpaw.
Kum ka sienjam ba mardor, ka Sorkar kan pynkynriah ïa ki nongpang sha ki guest house ba shu wai naduh u bnai ban wan. “Ngin sa shim wai ïa ka guest house ba thymmai ban ai jaka sah ïa ki nongpang ba wan na Shillong bad naduh u bnai ban wan ngin sa pynkynriah noh ïa ki shatei”ula ong.
Na ka bynta ka kam ba hadien habud, ka Sorkar ka thmu ban tei ïa ka Meghalaya House ba thymmai ka ban kham bun ki jaka sah. “Ngi la rai ruh ban tei ïa ka Meghalaya House ba thymmai ha Vellore. Ngi la pan ïa ka jingkyrshan bad ka jingmynjur na ka Tnad Planning bad Finance ban ïoh tei thymmai ïa ka jingtei” ong u Myntri.
“Ia mynta ki don tang 13 tylli ki kamra kiba treikam. Ka jingtei ba thymmai kan don arshah ne lai shah ki kamra khnang ba ngin lah ban ai jaka sah kham bun ïa ki nongpang bad ki nongap ha Meghalaya House Vellore” ong u Bah Sosthenes.