Hiar khynra ka ANTF ha Lumsurvey ïohkem 2 ngut ki nongkhaïi bad kurup drok ba shongdor bun lak tyngka

Shillong, Jylliew 22 : Ka kynhun Anti Narcotics Task Force (ANTF jongka jylla ka la hiar kyndit ban khynra ïa ka jingïakhaïi drok ha Lumsurvey mynta ka Lah Sngi U Blei bad ha kane ka jingkhynra kala ïoh ban kem ïa arngut ki nongkhaïi bad ïoh kurup buh bah u drok (heroin) bad u drok Pralaphernalia ba shongdor bun lak tyngka, ïathuh ki pulit.
Hadien ba ki pulit ANTF ki la ïoh jingtip kaba bniah halor kane ka kam khaïi drok ki la hiar kynsan sha Lumsurvey ban khang kdong ïa kine ki briew kiba donkti bad ki la ïoh ban kurup ia u drok ( deroin) ba khia 16.1 gram, 47 tylli ki synduk sabon ba suba ba la thep ïa u drok (heroin) bad kawei ka mobile phone.
Kine ki arngut kiba shah kem ki dei ka Sabina Begum 21 snem ka rta ka kurim u Omega Ali ba sah ha Lumsurvey, Shillong tangba kaba dei na 5th Mile, Samdhara, PS Sonitpur , Tezpur, Assam bad u Viru SIngh u khun jong u (LT) Taru Singh uba sah ha them Metor, ïewduh.
Ki pulit ka Sadar Police Station ki la rejister case halor kane ka jingïoh kem bad ïoh kurup kat kum ka NDPS Act.
Ki pulit ki suba jur ba kine ki arngut ki don da ka kynhun ban leh ïa kane ka kam khaïi drok hangne ha nongbah Shillong.
Ka kynhun ANTF ka dang pynlong ka jingtohkit bniah halor kane ka jingïoh kem ïa kine ki arngut ïathuh u SP ka ANTF u Vikash Kumar.
Kat kum ka jingbud dien jongka ANTF la lap ba ka Lumsurvey ka dei kawei na ki jaka ba jur bha ki kam khaïi drok mynta u snem. Namar tang hapoh une u 2026 ki la don lai tylli ki case ba la rejister tang na Lumsurvey bad la ïoh ruh ban kem haduh 7 ngut ki briew kiba dei beit na Assam.