Sa tang ha ka jingnang jingtip ki samla ba yn lah ban pynbha ïa ka jingeh jong ka jylla, ong u Bah H S Kharpran

Shillong, Jylliew 22: Ka Seng Kur Kharpran Shillong Circle ka la pynlong ïa ka General Meeting jong ka ha ka sngi nyngkong ha Dinam Hall, Jaïaw, Shillong, ha kaba ha kane ka jingïalang la wan ban ïashim bynta da kiba la shah khot sngewbha bad ki dkhot na ki circle bapher bapher jong ka Kur Kharpran.
Ïa ka jingïalang la pynïaid da u President ka Shillong Circle bad ka la don ka jingai kaiphod da Treasurer bad Secretary, la don ki jingïakren phylliew jingmut halor ka bha ka miat bad ka roi ka san jong ka kur bad jingkren da ki nongmihkhmat na Ri Bhoi, Mawtawar bad Sohryngkham Circle.
Ka la don ka jingjied ïa ki nongkitkam ba thymmai na ka bynta ka Shillong Circle ha kaba la ai ka jingkitkhlieh ban ïalam ïa ka kur shakhmat halor ki kam ki kam, ka jingïalong kawei bad kiwei.
La pynkup burom ïa arngut ki dkhot ka kur kiba kynthup ïa ka samla Ms. Emerene Kharpran bad samla Phiba Kharpran, halor ki jingleh bha jong ki ha ka pule puthi haba ka Seng Kur Kharpran Shillong Circle ka la Ïaroh bad ai khublei halor ka jingleh bha jong ki ha ka pule puthi kiban long ruh ki païa ïa ka pateng ban wan ki samla ka Kur.
Lah ïoh ruh ïa ka jingpynsngewthuh halor ba ïadei bad ka Unit jong ka seng kur da u Bah Heaving Stone Kharpran kum u secretary bad kumjuh ruh u MLA ka Mawryngkneng bad kumjuh ruh ka sneng ka kraw na u khamtam eh ïa ki samla pule jong ka kur ba ki dei ban long ka jingmyntoi ban tei pynbha ïa ka jylla bad ki jingeh jong ka.
Shuh shuh halor kane na ka liang jong u MLA uba dei ruh u Secretary jong ka kur u la ai mynsiem ïa ki samla kiba la pass bha bad kiba la wanrah burom ïa ka Kur da kaba ong, “Dei sa tang ha ka jingnang jingstad jong ki samla ba yn lah ban pynbha ïa ka jingeh ba la mad da ka jylla, ong u Bah H S Kharpran.
Na ka liang jong u bad ka Kur hi baroh kawei ki la ai khublei ïa kine ki samla kiba la ïoh ban kheit ïa u soh ka jingjop ha ki jingpule jong ki bad kyntu ïa ki ba kin ïaineh, ban ïai minot, ban bteng kane ka jingtrei shitom jong ki ha kaba ïadei bad ka jingjanai ha ka pule puthi bad kumjuh ruh ki la ai ka jingithuh ïa ki, kum kita ki riewkhraw ki ban lam lynti ïa ka pateng jong ki samla.
Ïa ka prokram la pynkut da ki kyntien ai khublei, ki jingïashon durlang, bad kumjuh ruh ka jingïalang ka la wai da ka jingphuh jingphieng hapdeng ka jingïashim bynta jong kiba bun bha ki dkhot jong ka Kur Kharpran.