Kular u CM ïa ki nongtrei PM-Poshan ban khmih bniah halor ka jingdawa pynkiew Honorarium

Shillong, Jylliew 21 : U Myntri Rangbah ka Jylla Conrad K Sangma ula ïakynduh hi da lade ïa ki Cook-cum-Helpers jong ka PM-Poshan scheme kiba dang ïakhih ha ka sngi Saitjain bad kular ha ki ba un sa khmih bad leh eiei ïa ka jingdawa jong ki ba ïadei bad ka jingpynkiew ïa ka honorarium.
Kine ki nongtrei ki la pynlong ïa ka jingïakhih da kaba rah placard shabar jong ka Courtyard by Marriott, Shillong, kaba jia ryngkat ruh ha ka por ka jingwan ïuhkjat ka Myntri Pla Tyngka ka Ri ka Nirmala Sitharaman. Kine ki nongïakhih ki la dawa ban pynkiew ïa ka bainong ba man la u bnai kaba la shu sah khlem pynthymmai shuh mynta ka jan 20 snem.
Katba ka jingïakhih ka dang ïaid, u Myntri Rangbah ula hiar ban ïakynduh ïa ki nongiakhih bad ïakren markhmat bad ki nongïalam jong ki.
Ka nongïalam ka union ka Gena Nengnong, kaba lamkhmat ïa ka jingïakhih, kala kdew ba wat hapdeng ka jingai jingshakri hapoh ka PM-Poshan Scheme la arphew snem, kam shym la don satia ka jingpynkiew ïa ka honorarium.
Ki nongtrei ki ïoh mynta tang 900 tyngka shibnai bad ki la kyntu ïa ka Sorkar ba kan pynkiew noh sha ka 9000 tyngka shibnai, haba kdew ïa ka jingkiew dor kiei kiei baroh.
Hadien ka jingïakynduh, ki dkhot ka Union ki la pynpaw ïa ka jingkyrmen ba ïa kane ka mat jingdawa bala slem jong ki, kan ïoh ïa ka jingshimkhia na ka liang ka Sorkar Jylla bad Sorkar Pdeng.