Shillong, Jylliew 21 : U Myntri kam ïada Ri u Rajnath Singh ula pynpaw ïa ka jingdonkam sted ïa ki technology, ka jingpeit bniah ïïa ki buit treikam bad ka jingwanrah ïa ki buit treikam thymmai da ki bor khmih ban lah pynkhlaiñ ïa ki jingpynkhreh hapdeng ka jinglong jingman ki bym i thikna jong ka pyrthei mynta.
Haba ïakren bad ki shipai ha ka Eastern Air Command HQ ha Shillong, ha ka Sngi Saitjain, u Myntri kam ïada Ri ula ban jur ba ki jingma kiba bun, ki jingeh ha ki kor internet (cyber), ka jingtip halor ki thma, ki jinglah ban pynpoi marbam, bad ki drone ki la long ki kam ba kongsan ha ka rukom long ki thma ba mynta bad ha kum kane ka khep, ka jingpynkhreh ba ju leh baroh shikatta kam pat biang satia na ka bynta ki bor ïada ri.
U Rajnath Singh ula ban jur ïa ka jingdonkam jong ka India ban kynthoh ïa ka Aatmanirbhata ban pynthikna ïa ka jingshngaiñ ka Ri ha la ka jong ka rukom pynïaid.
Ula pynpaw ba ka Operation Sindoor ka dei ka sakhi ïa ka jingjop ban sah ha ka khana pateng jong ka jingpyrshang ka Ri ban shaniah halade, kaba la lam khmat da u Myntri Rangbah Duh u Narendra Modi.
“Lyngba ka Op Sindoor, ngi la pyni ïa ki lehnoh bad ki nongpynïaid jong ki ba ka India kan ym ïapein ïa ka jingshngaiñ bad ka jinglong laitluid. Ka jinglah, ka jingpeitngor, bad ka jingkut jingmut kaba skhem jong ki bor shipai jong ngi sa shisien kala pyni ïa ka jingnang khlaiñ bor ka India sha ka pyrthei. Ka jingpynkha kum ïa ka Eastern Air Command kala long kum ka paralok ha kane ka jingangnud jongka Ri” ula bynrap.
Une u Myntri ula ñiew ïa ka Eastern Air Command kum u rishot uba kongsan bha na ka bynta ka jingshngaiñ jong ka Eastern Frontier ka ri India, haba ai jingïaroh ïa ka jinglah ban shim ïa ka bynta kaba kongsan bha ban pynkhlaiñ ia ka jingshngaiñ jong ka Ri.
“La ka dei ha madan thma, ha ka por ba shongsuk shongsaiñ, ne ban mih ïarap ha ki jingjia lynshop ki bor ka mariang, lane ka jingpynïaid ïa ki khappud, ka Eastern Air Command kala ïai pyni ïa ka jingtbit ha ka rukom treikam, ka jingshlur bad ka jingaiti lut ha man ki jinglong jingman” ula ong.
U Rajnath Singh ula ai jingïaroh ïa ki shipai ba shlur halor ka jingpyndep janai ïa la ki kamram hapdeng ki jinglong jingman kiba eh bad ba tynjuh.
