Plie ka Nirmala ïa ka Organic Spice Processing Plant ha Bhoirymbong

Nongpoh, Jylliew 19: Ka Myntri ka Sorkar Pdeng kaba peit ïa ka tnat Finance bad Corporate Affairs, ka Nirmala Sitharaman, mynta ka sngi ka la plie paidbah ïa ka Organic Spice Processing Plant ba heh tam ha ka thaiñ Shatei Lam Mihngi kaba don ha Lumdaitkhla, Bhoirymbong, Ri-Bhoi District.
Ïa kane ka karkhana la tei da ka Eastern Ri Bhoi Organic Farmer Producer Company Ltd ryngkat ka Meghalaya Basin Management Agency (MBMA) ha ka jinglut kaba kot kumba T.32 klur. Ïa ka pisa la bei da ka International Fund for Agricultural Development (IFAD) lyngba ka Meghalaya Livelihoods and Access to Markets Project (Megha-LAMP) bad ka MBMA lyngba ka FOCUS Program.
Kane ka karkhana ka la long ruh u mawjam ba kongsan ha ka jingpynkhlaiñ ïa ka rep ka riang ha ka jylla, ha kaba la khmih lynti ba kan pynkiew ïa ka dor bad ka ïew jong ki mar rep kum u sying, u shynrai bad u sohmrit lyngba ka jingpynwandur bad ka jingpynmih ïa ki mar kiba la dep saiñ. La khmih lynti ruh ba kane ka karkhana kan lah ban pynmih palat 10,000 metric ton ki mar rep man la u snem bad kan ai jingmyntoi ïa palat 5,500 ngut ki nongrep ka ha katei ka thaiñ.
Nalor kata, kane ka projek kan ïarap ban pynkhlaiñ ïa ka jingïaid iew jong ki mar rep sha ki ïew ki hat bapher bapher bad ban pynduna ïa ka jingdonkam ban shaniah na shabar jylla ka jylla.
Ha kane ka sngi, ka Eastern Ri Bhoi Organic Farmer Producer Company Ltd bad ki kompeni bapher bapher ki la ïasoi ruh ïa ka Memorandum of Understanding (MoU) ban kyntiew bad pynïaid iew ïa ki mar rep kiba la dep saiñ na kane ka karkhana.
La sakhi ïa kane ka jingïalang da ka jingdonlang u Myntri Rangbah ka jylla Meghalaya, u Conrad K. Sangma, u Myntri Rangbah ka jylla Sikkim, u Prem Singh Tamang, u Symbud Myntri Rangbah ka jylla, u Prestone Tynsong, ki Myntri Sorkar, ki MLA, ki ophisar sorkar na ka jylla bad district, nalor ki nongmihkhmat jong ki kynhun nongrep bad kiwei pat ki riew rangbah.
Haba kren ha kane ka jingïalang, u Conrad K. Sangma u la pynpaw ïa ka jingsngewkmen halor ka jingkiew shaphrang jong ka jylla ha ki kam pynroi bad u la ong ba ka sorkar jylla ka la shimkhia ban kyntiew ïa ka rep ka riang lyngba ki skhim bapher bapher kiba thmu ban pynlong ïa ki nongrep kiba lah ban ieng ha la ki jong ki kjat bad ban kiew ha ka ioh ka kot.
U la ong ruh ba watla ka rep ka riang ka dei ka kam kaba la don naduh ki por ba mynshwa, hynrei ka sorkar ka dang bteng ban pynjanai ïa ki rukom rep bad ban pynkiew ïa ka dor jong ki mar rep lyngba ka jingpynwandur bad ka jingsaiñ ïa ki katkum ki jingdonkam jong ka juk mynta. U la ong ba kane ka karkhana kan long ka jingkyrkhu kaba khraw ïa ki hajar tylli ki longïing nongrep ha ka jylla.
Na ka liang ka Nirmala Sitharaman, ka la ong ba ka Ri-Bhoi District, kaba la ithuh kum ka Aspirational District, ka la kiew shaphrang ha kiba bun ki liang ha kaba ïadei bad ka roi ka par bad ka la jan poi sha ki thong ba la buh bad khmih lynti ruh ba shen ka district Ri-Bhoi kan sa ioh ban mih noh na kane ka thup.
Ka la ai ka jingïaroh ïa ka jingjop jong kane ka projek bad ka la ong ba kane ka karkhana ka long ka nuksa kaba bha kumno ka jingbei tyngka ha ka rep ka riang bad ka jingpynwandur ïa ki mar rep kan lah ban kyntiew ïa ka jingïoh nong jong ki nongrep bad ka roi ka par jong ka jylla.
Ka Myntri ka la ai jingïaroh ruh ïa ka sorkar jylla hapoh ka jingïalam jong u Conrad K. Sangma bad ka kynhun Myntri halor ka jinglah ban pyntreikam ïa shibun ki projek kiba ai jingmyntoi ïa ki paidbah. Ka la pynpaw ruh ka jingkyrmen ba ki mar rep kiba la dep saiñ ha kane ka karkhana kin poi ym tang sha ki ïew ki hat jong ka jylla bad ka ri, hynrei wat sha ki ïew ka pyrthei.
Da kaba kdew ïa u shynrai Lakadong, uba la pawnam ha kylleng ka pyrthei namar ka jingdon jong u ïa ka curcumin kaba bun, ka la ong ba Meghalaya ka don ka lad kaba khraw ban long ka jylla kaba hakhmat eh ha ka jingpynmih bad ka jingshalan ïa ki mar rep organic sha ki ïew ki hat ka pyrthei.