Kyrpad u Myntri Rangbah ïa ka sorkar pdeng ban weng ïa ka jingbuh kyndon halor ka EAP

Shillong, Jylliew 19 : U Myntri Rangbah ka jylla u Conrad K Sangma ha ka sngi Thohdieng, ula ïathuh ba ka Jylla ka la kyrpad ïa ka Sorkar Pdeng ban weng noh ïa ka jingbuh kyndon ba heh duh ne ceiling ha ki Externally Aided Project (EAP) na ka bynta ka Meghalaya ha kane ka samoi treikam ka 16th Finance Commission, haba pynpaw ba kane ka jingbuhpud ka “ktah ïa ka jingtrei bha”.
Haba kren sha ki nongthoh khubor hadien ba ka Myntri Pla Tyngka ka Ri Nirmala Sitharaman ka la buh ïa u mawnongrim ïa ki project EAP ba 1,246 klur tyngka ha Meghalaya, u Myntri Rangbah ula batai ïa ka tynrai jong kane ka jingbuh pud ba la pynjari ha ka samoi jong ka Finance Commission ba la dep.
“Ha ka Finance Commission ba la dep, ha shiteng na kaba sdang ki kam, ka jingbuh pud kam shym la don satia na ka bynta ki Jylla ka thaiñ Shatei Lam Mihhngi. Kumba nga la ïathuh ha phi, 90% jong ka ram bala shim, la siew pat da ka Sorkar India” ula ong.
Ula bynrap ba namar katto katne ki Jylla, kynthup ka Meghalaya, ki la lah ban ïoh kham bun ki project, ka Finance Ministry hadien ka la buh noh da u pud . “Kumta, ka Finance Ministry ka sngew ba ka dei ban buh da ka pud ba haduh katno ki Jylla ki lah ban shim. Kumta, nga la kren biria ïa ka Myntri ha kato ka por ba phi la dain kuna ïa ngi namar ka jinglah treibha hynrei ka ong “peit phim donkam ban hap siew biang, ngi hap siew ma ngi ïa ka ram, kumta, ngin sa khmih ïa baroh kine ki bynta” pynkynmaw u Conrad.
Ha ka jingpynbeit ba hashuwa, ka Meghalaya ka la ïoh ïa u pud shim ram ba kot kumba 3,500 klur tyngka. Ka Jylla, ka la tam bun shah ïa une u pud namar ka jingbiang ka rukom plan ïa ki kam.
“Hynrei kumba phi ïa tip, haba bynrap lang ïa baroh ki project ba ngi la lah ban pynïoh ka la kot shaka 12,000 klur tyngka. Kane ka dei kaba ngi la trei shitom bad ngi la ïoh ïa kane ka pisa” ong u Myntri Rangbah.
Na ka bynta ka samoi treikam jong ka 16th Finance Commission, ka Jylla ka la buh ïa ka jingkyrpad ban weng noh ïa kane ka jingbuh pud.
“Mynta u snem ngi la kyrpad ba ka rukom buh pud kam dei shuh ban don na ka bynta ka 16th Finance Commission. Kumta, ka shong ha ka Mynti kam pla tyngka bad ka Sorkar Pdeng bad khamtam eh u Myntri Rangbah Duh ban rai halor kane. Ngi la dep buh ïa ka jingkyrpad, ka jingkyrpad jong ngi ka long namar ba lada kam don ka jingbuhpud, ngin lah ban ïoh kham bun ban shim ram” ula pynpaw.
U Conrad ula pynshai ruh ïa ka rukom pynbeit ïa ki jinglut pisa jong ki EAP haba pynpaw ba ki Jylla ki hap ban siew khyndiat eh.
“Haba kut hi, ngi hap ban kynmaw ba ka Sorkar Jylla ka dang hap ban siew 28% jong katei ka pisa. Kumta, kam dei satia kaba ngi lah ban shu shim khlem pud kat kaba ngi kwah. 72% la siew biang lane siew da ka Sorkar India katba 28% ka wan na ka Sorkar Jylla. Kumta, ngi donkam ïa ka bor ban lah siew pat ïa katei ka 28%” ula ong.