ïakhun mukotduma pyrshah ka tnad Pulit ïa ka hukum ai jamin ïa ka Sonam Raghuvanshi: DGP

Shillong Jylliew 19: Ka Director General of Police ka Kong Idashisha Nongrang ha ka Sngi Palei, ka la pyntip ba ka Tnad Pulit ka ujor mukotduma pyrshah ïa ka hukum ka ïing Bishar halor ka jingai jamin ïa ka Sonam Raghuvanshi, ka nongshah kynnoh ba hakhmat eh halor ka jingpyniap ïa la u kurim uba dei u nongkhaïi na Indore u Raja Raghuvanshi.
“Halor ka kam jong ka Sonam, ngi lah mudui da ka mukotduma pyrshah ïa ka ïing Bishar kaba la pynmih ïa ka hukum ban ai jamin noh ïa ka” ong ka DGP haba ïakren bad ki nongthoh khubor.
Haba jubab ïa ki jingkylli halor ka jingkynnoh ba ka la don ka jingdkoh ka rukom treikam da ki ophisar kiba pynlong ïa ka jingtohkit, ka Kong Nongrang ka la ong, dei ban ai ka jinglaitluid ha ka rukom treikam jong u Investigating Officer ha ki jingjia kiba kham jwat kiba kynthup ïa bun ngut kiba suba jur.
“Phi hap ban ai katto katne ka bynta jong ka jinglaitluid ïa ki IO khamtam ha kane ka jingjia, kam dei tang ïa iwei i briew, ki don bun ngut ki briew bad kane ka dei kaba don tang ha kawei ka kot namar ba ka Transit Remand ka long ka kyndon kaba dei (correct section) ka dei tang ha kawei ka kot hi ba ïa katei ka kyndon la kum bakla thoh” ka la ong.
Ka DGP kala pynshai ba ha ka Transit Remand Proceeding la kdew ïa ka kyndon kaba dei, hynrei ka jingbakla ka la long tang ha kawei pat ka kot ïa kaba la kum bakla thoh ïa katei ka kyndon. Kala ong, ba katei ka jingduna kam shym la ktah pat ïa katei ka Case baroh kawei.