Ki nongpynïaid hima kim shym la pynthut ïa ka jingleit khynra Trading License
Dei ki dkhot ka Seng Samla pynshai u Acting Syiem
Mawkyrwat, Jylliew 18: U bah Briliant Henry Syiemiong uba dei u Acting Syiem jong ka Hima Langrin ula pynshai lyngba ki lad pathai khubor ba na ka liang ki nongpynïaid hima kim shim la pynthut ïa ka jingleit khynra trading license ki dkhot ka Seng Samla, hynrei kum ki nongpynïaid hima kiba peit ïa ka shongsuk shongsaiñ jong ka ïew ka hat ki shu wan ban kylli ba ki wan leh aïu namar ba kim don jingtip ei ei bad hadien ba la ïoh jingpynshai na u bah P.S. Lyngdoh, ki la shah sngewbha ba kin pyndep ïa ki kam jong ki ban khynra trading licence hynrei ki la maham pat ba kim dei pat ban pynthut ïa ki kam kiba ktah ïa ka hima.
Kan ka jingpynshai paidbah jong ka Hima Langrin ka dei halor ka kynrum kynram kaba jia ha ka 17 tarik u Jylliew, 2026 ha ïew Borsora ha kaba ka la don ka thma ktien kaba jur hapdeng ki ar kynhun kata ki dkhot ka Seng Samla Hima Langrin bad ki nongïalam jong ka Hima Langrin ha ïew Borsora kaba don ha South West Khasi Hills District bad kaba la sakhi ruh lyngba ki dur khih ha kaba na ka liang u Bah P.S. Lyngdoh, President jong ka Seng Samla Hima Langrin u la kynnoh ba ka don ka jingpynthut jong ki nongïalam ka Hima ha ka por ba ki dkhot ki dang khynra Trading License ïa ki dukan bar jylla kiba wan khaïi ha katei ka jaka.
Shuh shuh, u bah Briliant Henry Syiemiong halor kane ka kam, u pynshai ruh ba u bah P.S. Lyngdoh ha ka jingïakren um shym la sngap hadien ba la dep ban khynra trading license u la leit ban tuklar sa ïa ka khyrdop lum khajna jong ka hima da kaba kynnoh ruh ba ka dei ka khyrdop kaba lum khajna be-aiñ ha kaba ka la mih ka jngïania kaba jur hapdeng ki ar kynhun.
Ym tangkata, la ong ba ha kaba ïadei bad kane, u bah Wadlad Lyngdoh uba bat kum u Secretary ka Hima Langrin ula pynshai ba kane ka khyrdop kam dei kaba be-aiñ, hynrei ka dei ka khyrdop jong ka hima kaba la don naduh ki por kulong kumah bad u la ïathuh ruh ïa kane ka khyrdop ka dei kaba la ïoh jingithuh na ka KHADC bad ki bor distrik.
Kumta, na ka liang ki nongïalam ka Hima Langrin ki pynrem jur ïa u bah P.S. Lyngdoh da kaba kynnoh ruh ba u u dei u briew u ba ju pynkulmar na ka por sha ka por ïa ka suk ka saiñ jong ka hima.