Nongstoiñ, Jylliew 18: Ka All Meghalaya Labour Association Mawshynrut Circle hapoh ka jingïalam u bah Banlang Sohphoh President bad u bah Phidius Rynïong Secretary katei ka seng, ki la leit ban ujor da ka jingthoh sha ka Hema Nayak Deputy Commissioner ka West Khasi Hills District halor ka jingdon bun tylli palat ki khyrdop lum pisa ha shi lynter ka surok kaba na Riangdo sha Athiabari.
Katkum ka jingkynnoh jong kitei ki nongïalam ka seng All Meghalaya Labour Association Mawshynrut Circle, la ong ba ha katei ka surok kat haduh mynta ki la don haduh kumba 12 tylli ei ei ki khyrdop lum pisa, kynthup ïa ki 6 tylli jong ka Council, 3 tylli jong ki Hima kynthup jong ka Hima Nongstoiñ, Hima Jyrngam bad Hima Riangsieh, bad 3 tylli pat ki dei jong ka Smoke test. Kumta katei ka jingbun jong kitei ki khyrdop lum pisa ka la ktah palat ïa ka khaïi pateng jong ki paidbah ka thaiñ khamtam ïa ka ïoh ka kot ha kum kane ka juk kaba hiran ha ka kamai kajih.
La ong ba ka seng haba ïadei bad katei ka phang dang shen ka la dep ruh ban leit ban ai da ka jingthoh ha ka ophis jong ka KHADC Shillong. Kumta, ka seng ka la maham tyngeh ruh ba lada kim weng ïa kitei ki khyrdop, na ka liang jong ka seng kan sa leit ban tied jingkhang hapoh ka ïingbishar jong ka Meghalaya High Court.
Ka seng lyngba u Banlang Sohphoh, ka la kynnoh shuh shuh da kaba tyngeh khamtam ïa ka Council bad ka sorkar da kaba ka la ong kumno tang ha kawei ka surok, haduh 6 tylli ki Khyrdop tang jong ka Council, haba wat 2 tylli ruh ka lah bun.
