Halor ki 85 tylli ki mokutduma ‘Ba jop ne ba rem ngam lah ban ai ka jubab’ ong ka Kong Deity

Shillong, Jylliew 16: Ka Executive Member (EM) ba khmih ïa ka tnat Legal Affairs jong ka Khasi Hills Autonomous District Council (KHADC) Kong Deity H Majaw halor ka jingdon ki 85 tylli mokutduma kala ong, “Ba jop ne ba rem ngam lah ban ai ka jubab”.
Ïa kane ka Kong Deity kala jubab ha ka kynta kylli jingkylli ha ka sngi ba sdang jong ka Dorbar Lyiur jong ka Council, ba la buh da ka MDC na Nongshken Kong Grace Kharpuri halor ki mukotduma ba sahkut ha Iingkashari Meghalaya High Court kidei naduh u snem 2022 haduh 2026.
Ki don haduh 85 tylli ki mukotduma jong ka Khasi Hills Autonomous District Council (KHADC) kiba dang sahteng hapoh ka Iingkashari Meghalaya High Court, ong ka Kong Deity.
“Kine ki mukotduma ki kynthup 6 tylli mukotduma naduh u snem 2022, kawei ha u snem 2023, 4 tylli ha u snem 2024, 58 tylli ha u snem 2025, bad 16 tylli ki mukotduma ha u snem 2026” ong ka kong Deity.
Ka Kong Deity ka ïathuh ba ha u snem 2023, la pynkut (dispose) haduh 30 tylli ki mukotduma.
Na ka liang u Bah Titos W Chyne haba bynrap ïa ka jingkylli u la ong ba tang hapoh 2 snem ka KHADC ka don case bad napdeng kine katno tylli ba ka KHADC kala jop ïa ki mokutduma, ka Kong Deity kala ong, ‘Ba jop ne ba rem ngam lah ban ai ka jubab’.
Namar kane ka jubab ba u nongialam ka liang pyrshah u ioh na ka EM, u Bah Titos u la ong kylla ba kane ka jubab ka bym don ka jingkitkhlieh.
Shuh shuh ka EM kala pyntip ruh ba ka District Council ka don- 1 Special Counsel, 3 ngut ki Standing Counsel, 1 Legal Assistant bad 1 Lawyer ban peit ïa ki mukotduma jong ka Council.
Halor ka jingkylli ba la buh da u MDC ka Shella u Bah Barikupar Synrem uba la buh ba balei kat ka council kam buh da u briew lajong hynrei la thung kylla da ki briew kiba nabar, ka EM haba jubab kala ong ba ki hap ban peit ïa ka jingtbit bad ka jinglah jong ki.