Mynjur ka Sorkar ban thaw da ka Committee ban pynkhreh ïa ka Polisi tih dewïong ha ki jaka ba rit ha jylla

Shillong, Jylliew 17 : Ka sorkar jylla ka la mynjur ban thaw noh da ka Committee ban khlieh da u Deputy Commissioner ka East Jaintia Hills bad ki dkhot ka Jaintia Coal Mines and Stone Quarries Welfare Association (JCOMSWA) ban pynkhreh ïa ka polisi na ka bynta ka kam tih dewiong ha ki jaka ba rit bad kane ka long hadien ba la bteng ka jingshah thngan ba la bun bun sngi da ki dkhot katei ka seng ha Khliehriat.
U Information Secretary ka JCOMSWA u Overcome Dkhar u la ong mynta ka Sngi Balang ba ïa kane ka rai la shim ha ka jingïakynduh bad u Chief Secretary jongka jylla.
U la ïathuh ba kane ka Committee kan pynkhreh ïa ka polisi kumno ban tih dewiong ha ki jaka ba rit ne da ki nongtih dewiong ba rit ha East Jaintia Hills.
Ka sorkar ka la mynjur ruh ban pynsangeh shwa shipor ïa ka jingwan u dewiong na shabar ka jylla tad haduh ynda dep leit jngoh u Justice (Rtd) BP Katakey ka ban long ha ka 29 tarik Jylliew 2026.
Nalor kane ki heh sorkar ka la pyntip ruh ba kito kiba shah ktah ki lah ban pan jingïarap na ka Meghalaya Environment Protection and Restoration Fund kaba peit bad pynïaid hi da u DC ka East Jaintia Hills.
Ka sorkar ka la mynjur ruh ban ïakren bad ka Jaintia Hills Autonomous District Council (JHADC) na ka bynta ban pynkhlaiñ ïa ki aiñ ban ïada ïa ki hok ki trai jaka puta.
Hynrei wat hapdeng kine ki jingkular jongka sorakr ruh ka JCOMSWA ka la ong ba kam pat hun shispah na ka shispah bad kumta ka jingshah thngan kan ïai bteng beit tad haduh ka jingwan jngoh jongu Justice Katakey.
U Dkhar ula ong ba katba u President u dang don hapoh hospital ka jingbteng shah thngan ruh kan ïai bteng beit tad haduh ban da la ïoh jingshai kdar ban shah ïa kito ki nongtih dewiong ba rit ba kin bteng biang ïa ka kam kum mynshwa.
Halor kane ka jingtih dewiong kat kum ka juk saian u Dkhar u la ong ba ka seng kam pdiang satia ïa kane ka 100 hectare namar kiba rit ba ria kim kot bor ban leh kumtei.