SHILLONG, Jylliew 14: Ha kawei pat ka jingpyrshang ban kyntiew ïa ki jingkheiñ jong ki takma ka Meghalaya State Kickboxing Association (MSKA) ka la phah ïa ka kynhun kaba don 7 ngut ban ïashim bynta ha ka Sub Junior National Kickboxing Championship ban long ha Indore Madhya Pradesh.
Kane ka Championship kan sdang naduh ka 17 tarik haduh ka 21 tarik mynta u Jylliew 2026. Ka kynhun kaba kynthup ïa 4 ngut kynthei bad 3 ngut shynrang ki la mih na nongbah hynne ka step ryngkat ka jingkyrkhu na i Sister Principal jong ka St. Francis De Sales SS.
U Dajied Kyrpang Synjri, un mihkhmat ïa ka jylla ha ka Kick Light & Low Kick below 48 kgs. Nangta ka Zyarra Kharkongor bad ka Bashanpaia Kharkongor kin shim bynta ha ka Light Contact below 38 kgs bad Kick Light below 40 kgs.
Ka Heilina Sad kan ïashim bynta ha ka Light Contact below 42 kgs bad Point Fighting below 28 kgs. Nangta baroh arngut ka Abigail Ridamaka L Pyngrope bad ka Ribhadaker Bina kin shim bynta ha ka Kick Light below 40 kgs bad ka Light Contact below 48 kgs.
Ki nongïalehkai kiba lah ban ïalehkai bha ha kane ka lympung ki lah ban shah jied ban mihkhmat ïa ka ri India ha ka lympung International Kickboxing Championship.
ïa kane ka kynhun yn synran lang da katto katne ki nongïalehkai kickboxing ba paw jong ka jylla, kata u Babit Kharsahnoh, ka Felicia K Synjri bad ka Daniella I W Mylliemngap kum ki Team Coach.
