Shillong, Jylliew 14: Ka Argentima Team-A ha ka sngi Saitjaiñ ka la ioh rah ïa ka nam lahduh ha ka jingïalehkai football kaba la pynlong da ka Seng Samla Malki.
Ka Seng Samla Malki ka la pynlong ïa ka 2nd Malki Open Football Tournament kaba shi sngi, kum shibynta ban kynmaw burom ïa u President ba la khlad noh jong ka Seng Samla na Malki, kata u Bah Kenedy.
Ka jingïoh ban ïashim bynta ki nongkyrshan ka Argentina ha kane ka lympung ïalehkai, kadei hadien ba la kut ka jingïaid paidbah ba la pynlong ha ka step sngi Saitjaiñ kaba dei ka Argentima Messi Fan Club, Meghalaya, ban burom ïa u khlur ïalehkai ba paw ka pyrthei u Lionel Messi shuwa ba un shongthaid noh hadien ka World Cup, kumta ki namar ka jingbym dap team, ki nongpynïaid ki la khot sngewbha ïa ki nongkyrshan ka Argentina ban ïalehkai lang.
Kumta ki nongkyrshan ka Argentina & Messi ki la long ba la kloi ban ïa shibynta ha kane ka tournament ha kaba ki la rung ar team, kata ka Argentima Team-A bad ka Argentina team-B.
Ha ka jingïalehkai ka Argentina team-B ka la rem noh ha ka Quater final bad ka Argentina team-A pat ka la jop bad rung sha ka Semi Final. Ha ka jingïakhun ïa ka Semi Final ka Argentima Team-A ka la jop biang bad rung sha ka Final.
Ha ka jingïakhun ïa ka Final ka Argentima Team-A pyrshah ïa ka Just For Fun, ka Argentima Team-A ka la jop da 1-0 kol ban rah ïa ka nam lahduh.
Ka SS Malki ka la ai khusnam ryngkat ka song pisa ba 5000 ïa ka team jop bad 3000 sha ka team ba rem.
Ha kane ka sngi la donlang kiba ha iing ha sem jong u Bah Kenedy bad ka kurim, ki nongshong shnong ka Malki, u Rangbah Shnong, ka Kong Ampareen Lyngdoh MLA ka Nongthymmai Konstitwensi, ka Kong Deity Majaw, MDC na Malki bad kiwei kiwei de.
