Mawkyrwat, Jylliew 14: Ka Nonglang Sports Club ha ka sngi saitjaiñ jong ka taïew ka 13 tarik u Jylliew, 2026 ka la ïoh ban pynkut noh ïa ka Inter-dong Football Tournament Under-15 ki khynnah shynrang jong u 2025 – 2026 ba la pynlong ha madan Pyndeniewlyngdoh, Nonglang, South West Khasi Hills District.
Ha ka jingïalehkai final, ka Dong Lawmyrsiang bad ka Dong Pyndenbah ki la ïakynduh ha ka jingïakhun ha kaba ka la long kaba itynnad bad kaba ïakhaid. Lah ban kdew ba naduh kaba sdang jong ka jingïalehkai, baroh ar tylli ki kynhun ki la pyrshang ban pyni ïa la ka sap jingïalehkai, hynrei ka Dong Lawmyrsiang ka la ïoh ban thep ïa ka kol kaba nyngkong lyngba u Banskhembiang Kharraswai ha ka minit kaba 20.
Wat hadien kata, ka Dong Pyndenbah ka la ïaleh shitom ban pynphai, hynrei kam shym la lah ban pynurlong ïa ki kabu ksiar kiba ka la ïoh. Kumta haduh kaba kut jong ka jingïalehkai, ka Dong Lawmyrsiang ka la pynliem ïa ka Dong Pyndenbah da 1 – 0 kol bad rah syndon ïa ka nam lahduh jong kane ka lympung.
Ha kaba kut jong ka jingïalehkai, la sam ïa ki khusnam, kata ïa ka nam ‘rangïalehkai ba tbit la ïoh da u Welky Snaitang, u nongapdien ba tbit la ïoh da u Melakyrshan Kharlyngdoh, u nongthep bun kol dei u Pyntngenlang Marweiñ, u nongapkol ba tbit la ïoh da u Arky Kharlyngdoh, u ‘rangïalehkai ba tbit jong ka jingïalehkai ha ka jingïalehkai final la ïoh rah da u Banskhembiang Kharraswai.
Ha ka jingïalang pynhap pyrda, la wan ban long kum u kongsan da u bah Bhalumlang Kharlyngdoh ha ryngkat ka jingsynran lang da u Bah Syntarlin Snaitang, President ka Nonglang Sports Club, u Bah Kordorlyne Kharlyngdoh, Secretary ka Nonglang Sports Club, u Bah Angelbert Snaitang uba la long ruh u nongpynïaid ïa ka prokram bad ïa kane ka tournament naduh kaba sdang, ryngkat bad kiwei pat ki rangbah shnong bad ki samla kiba la wan ban sakhi lang ïa kane ka sngi kyrpang.
