SHILLONG, Jylliew 14: Ka Laitlyngkot SC bad ka Iaitylli SC ki la jop ïa la ki jong ki jingïalehkai jong ka Group F ha ka lympung U-20 4th Division Football League 2026 ba la pynïaid da ka Shillong Sports Association, ha ka sngi Saitjaiñ.
Ka jingïakhun ba nyngkong, la sakhi ïa ka Laitlyngkot SC kaba wanphai na ka ar kol ban jop da 3-2 ïa ka Gorkha Association.
Ka Gorkha Association ka la ïoh ban lamkhmat lyngba ki ar kol na u Nikhil W Sangma (7 & 30’) hynrei ka Laitlyngkot ka la jubab da kaba pynkhihjar lyngba Ericson Kharumnuid (35’), u Damebanker Nongkynrih (42’) bad u Nangtei Rynjah (44’) ban khur ïa ka jingjop.
Nangta ha ka jingïalehkai kaba bud, ka Iaitylli SC ka la pynliem noh da 4-1 kol ïa ka Iateilang SC, ha kaba u Kitbok MusKut u la thep ïa ka hat trik (28, 33 & 62’), katba kawei pat ka kol la thep da u Pynsuklang Lyngdoh (68’).
Ka shi kol jong ka Iateilang la thep da u Teiborlang Kharsahnoh ha ka minit kaba 40.
