Byrngem ka VPP ban ïakhih paidbah bad khanglad ïa karkhana dewbilat ban treikam

Khliehriat jylliew 13 : Ka Voice of the People Party East Jaiñtia Hills District haba kren sha ki pathai khubor mynta ka sngi ka la pynpaw ïa ka jingbitar ïa ka jingleh ka sorkar kaba shu khynniat sha u paidbah ïa ki jingeh baroh ha kaba ïadei bad ka kam dewïong hapoh ka jylla, u President ka VPP na ri lum Jaiñtia, u bah Damewanhi Rymbai, u la byrngem ban pynlong da ka jingiakhih paidbah bad yn khanglad ruh ïa baroh ki karkhana dewilat kiba don hapoh East Jaiñtia Hills ba kin treikam lada ka sorkar kam sngap ïa ka jingdawa ki paidbah ban plie noh ïa u dewïong.
U bah Damewanhi Rymbai u la ong ba mynta ki dang sngap bad ap ia ka por kumba la ai por da ka Jaiñtia Coal Miners and Dealers Association (JCMDA) bad ynda la kut kane ka por ka VPP ruh kan sa mih shakhmat ban pynlong jingiakhih ban pyni sha ka sorkar ïa ki jingeh ki paidbah na ka daw ka jingkhang dewïong.
“Halor ka jinglong jingman ka East Jaiñtia Hills District ha kaba ïadei bad ka kam dewïong, ka la don ka jingpynbor jong ki paidbah ïa ka sorkar ba dei ban plie noh mardor ïa ka jingtih dewïong, ngi la ioh ïa ki kynhun bapher bapher ki la ia mih shakhmat bad dawa na ka sorkar bad ngi la iohi ruh ba ka la don ka kynhun kaba la shim da ka jingiakhih shahthngan ban pynbor ïa ka sorkar te hapdeng kane ka jingiaid lynti kaba sngewsih pat haba nga iohi ïa ka jingkren jong u symbud myntri rangbah ka jylla u bah Sniawbhalang Dhar ba la paw ha ki pathai khubor ba u la pynpaw ba ka sorkar ka dang ap ïa kata ka jingpynkhreh ïa ma mining plan na ki nongkhaïi dewïong, te kane ka la pynlyngngoh shikatdei eh ïa ngi, namar haba phai dien ka jingiakhih ki dewïong ka la sdang naduh ka 7 tarik u bnai ïaiong 2026 da kaba iaid rally te haba ioh pat ïa kane ka jingkren u symbud myntri rangbah ka la pynlynngoh ïa ngi bad ka sorkar haduh mynta kam pat leh eiei ruh em, ka sorkar ka dang shaniah pynban ha ki nongkhaïi dewïong ban leh ïa ka plan, te ka jingkylli kaba nga buh hakhmat ka sorkar, ka long Hato ka tnat Mining and Geology, ka tnat DMR kam don briew mo, kumjuh ruh kine ki nongmihkhmat jong ngi naduh u MLA, MDC kiba don ka bynta kaba khraw ban lem ïa ka kam ban shna ïa ki ain ban shna ïa ki plan, kane ka jingkren u Symbud myntri rangbah ka paw pynban kumba ka sorkar ka mut ban thet kti halor kane ka jingdawa ba shonghok jong ki paidbah jong ka jylla baroh kawei, namar kane ka jingkhang dewïong ka la ktah ïa ka jylla hi baroh kawei, lyngba kane ka jingkren u symbud myntri rangbah ngi iohi ba ka don kaei re kaei sha lyndet ka ban shu shaniah pynban ha ki seng dewïong ban leh ïa kata ka Mining Plan” ong u bah Damewanhi Rymbai.
“Kaba sngewsih shuh shuh ka long ba kum ka party VPP ka la ai ka jingkyrshan ba pura ia ka Jaiñtia Coal Miners and Dealers Association (JCMDA) ha kaba la dep ai por ruh haduh lai bnai ïa ka sorkar ban leh eiei, hynrei kaba pynlyngngoh ïa ngi ka long ba mynnin ka sngi palei ka 11 tarik jylliew ba ka JCMDA ka la leit iashong jingialang ha company Topcem na ka bynta ban leh ne pynkhreh ïa ka presentation ban aiti sha ka sorkar, te kane ka la pynlyngngoh ïa ngi ba hato kine ki karkhana dewbilat ki dei ma ki kiba don bor ban iarap ïa ka seng dewïong ha kaba shna ïa ka Plan, hynnin ka sngi ki nongialam ka JCMDA lem bad ki nongmihkhmat na East Jaiñtia Hills District ki la leit pyndem khrup hakhmat ki heh jong ki karkhana dewbilat ha Topcem na ka bynta ban aiti ne shaniah ha ki ban pynkhren ïa ka Mining Plan, ngin pyrshah ïa kane ka jingleh lada ka long kaba dei bad kaba bha ban plie ïa u dewïong, hynrei kum ka party ngi kwah ban tip haba ngi iohi ba u symbud myntri rangbah u la khynniat ïa kane ka kam sha ka seng khaïi dewïong ban shna ïa ka mining plan, ngi kum ka party ngi kwah ruh ban tip kaei kata ka Agency ne kaei Consultant ban shna ïa kane ka Mining Plan? ioh lehse ki shna pynban da ka byniadei bad kane ka jaka jong ngi, ïa kane ngi hap ban peit bad bishar, ka VPP ka la ai jingkyrshan naduh ba sdang bad ngi ka pan copy ïa kata ka Plan ka jongki khnang ba ngi ruh iohi lang ba lada ka dei ban pdiang ruh ngin pdiang kam lei lei, lada ka sorkar ka tlot haduh ba kam don kita ki riew shempang ne ki expert te ban shaniah u paidbah ruh kam lei lei hynrei ka jingkop ka sorkar NPP kaba ong ba ka biang ki briew kiba lah ban leh ïa ki kam ka long da khongpong pynban ba ka hap ban shaniah pynban ha u paidbah ban leh ïa ka kam, ka jingkren u symbud myntri rangbah ka long kumba theh um pjah”
“Ka sorkar kam dei ban khynniat sha u paidbah ïa ka kam ban shna Mining Plan, lada ka sorkar ka sngewkhia bad ieid shisha ïa ki paidbah te ka ka la dei ban shim ïa ka jingkitkhlieh, lada ka iohi ba kam long ban trei da ka Open Cast te balei ka sorkar ka pdiang ïa kane naduh ba sdang? Kane ka pyni shai ba ki nongmihkhmat jong ngi kim tip ïa ka bneng ka khyndew, kim tip ia ki aiñ ki kanun naduh sdang haduh ba kut, ki la shuh shah rong kumba rong ka um saw, kum ka VPP ngi kren shai ba lada kut kane ka jingai por ka JCMDA bad lada kam don kano kano ka jubab na ka sorkar ngi ka VPP ngin nym shah shuh ïa kine ki karkhana dewbilat ba kin treikam hapoh ka district, kan nym long kaba suk ba ma ki kin kamai spah katba ma ngi pat ngin shu jawdud, ngi kwah ban ïa dap ïa biang lang, lada ïa u bar jylla la ailad ïa ngi ruh dei ban ailad, ym dei ban wad daw da kumne da kumtai, kane ka dei tang ka jinglehkai politik, lada ka sorkar ka don ka mon ka lah ban plie ïa u dewïong kam don jingeh, te kane ka jingkhynniat ïa ki kam sha ki paidbah bad lada aiti sha ka sorkar ïa kata ka Mining Plan, ka sorkar pat kan sa ai daw ba kan hap examin, ba kan phah sha ka sorkar pdeng, ngim tip la ka dei ban leit sha ka sorkar pdeng ne sorkar jylla tang kawei ka long ba ki paidbah hi ki kwah ban plie noh ïa u dewïong, te ka jingkren u Symbud Myntri Rangbah ka long ka jingkren poh khamtam ïa ka sorkar kaba shu shaniah ha u paidbah ban shna Mining Plan, lada ka long kumne kam don jingmut ban don ka sorkar, kam don jingmut ban don ki nongmihkhmat” bynrap shuh shuh u bah Damewanhi Rymbai.
U la ong ba ka sorkar kam dei ban shu pynbiej ia ki paidbah hynrei ban leh ïa ka kam, ha kaba na ka liang ka VPP ruh kan ai ka jingkyrshan lada ka sorkar ka trei ïa ka kam “Kumba long mynta kato kaba jia ha Thangsko ruh ka dang don ha ka jingbishar bad jingtohkit bad haduh mynta ngim pat iohi dak eiei ba kan mih na ka jingtohkit, hapdeng ba dang don ka jingtohkit ki la mih ki jingdawa kiba bun te ka shong ha ka sorkar ba ka dei ban leh eiei hashwa ban kut ka por, wat ju ialehkai bad ka sur jong u paidbah bad lada ialehkai kumne ha kawei ka sngi u paidbah ruh un sa jubab ïa kaei kaba la shu leh mon ka sorkar” ong u bah Damewanhi Rymbai.