Wat hapdeng ka jingbun ki kynhun jaitbynriew, ka India ka khlaiñ bad ka ïailong kawei: Bah Lahkmen

Shillong, Jylliew 13: U Myntri ka tnat Pule Puthi ka sorkar jylla u bah Lahkmen Rymbui, u la leit ban ïashim bynta hapoh ka Valedictory Ceremony jong ki samla pule kiba mihkhmat na ka jylla Telangana bad u la leit ban shim bynta ha kane ka prokram kum u kongsan ha ka jingïalang kaba la long ha Indian Institute of Management (IIM) Shillong. Ïa ka prokram la pynlong hapoh ka jingïatreilang bad ka National Institute of Technology (NIT) Warangal bad kaba la pynlong da ka IIM Shillong.
Ha kane ka ceremony la wan ban shim bynta da ki ophisar bad ki nongtrei nonghikai jong baroh artylli ki jaka pule, ba kynthup ïa ki Nodal Officers jong ka IIM Shillong bad NIT Warangal, ha ryngkat bad ki samla pule kiba mihkhmat na Telangana kiba la wan ban shim bynta halor ka pule puthi bad ka jingïasam ïa ki kolshor.
Haba kren ha ka jingïalang, u Myntri u la pynpaw ka jingdonkam ka jingïasoh hapoh ka ri, ka jingïaburom lang markylliang bad ka jingïasam ïa ki kolshor hapdeng ki samla pule jong ka ri. U la kdew ba wat ba ka India ka long ka ri kaba bun ki jingïapher la ka long ha ki ktien, ki jingleh ha ki riti dustir, ki kolshor bad ki lynti jong ki jingim, hynrei kine ki jingïapher ki long tang ban pynkhlaiñ ïa ka jingïalong kawei hapoh ka ri.
U kynthoh ruh da kaba ong ba ki nongmihkhmat ki la ïoh ka lad ban mad nyngkong ïa ka jylla Meghalaya bad ban sngewthuh ïa ki briew jong ka, ka kolshor bad ki jingleh naduh ki long shwa manshwa. U la banjur ba manla ki thaiñ jong ka ri India ki la noh synniang da ka jinglumlang ïa ka jingithuh jong ka ri bad yn ym don kiba lah ban phiah ïa ka mynsiem kaba la tehsong ïa ka jingïalong kawei lang jong ki nong India.
U la pynshlur ïa ki samla pule ban rah ïa kane ka mynsiem jong ka jingïalong kawei sha kano kano ka jaka ba ki leit bad ban synniang da kaba bha sha ka imlang sahlang, ha ki kynhun bad kumjuh ruh sha ka ri.
U la kyntu ïa kiba wan mihkhmat ban long ki ambassador jong ka Meghalaya bad kane ka thaiñ shatei lammihngi, ban sam ïa ki jingmad jong ki bad ban kyntiew ïa ki jingsngewthuh jong ki ban sam hapdeng ki paralok bad ki kynhun jaitbynriew.
U la ïaroh ïa ka IIM Shillong, NIT Warangal, ki nonghikai, ki nongpynïaid bad ki nongtrei kiba kyrshan halor kane ka prokram kaba kongsan bad kaba shoh jingmut.
“To ngin ïa im kum shipara, to ngin shemphang iwei na iwei pat, burom iwei ïa iwei pat, rah ïa ka jingmut jong ka kamram sha ka longbriew manbriew bad ka imlang sahlang. Da ka jingïatreilang ngin lah ban thaw ïa ka India kaba khlaiñ bad kaba long kawei,” ong u Myntri.
Ka prokram ka la kut da ka jingsam ïa ki syrnot Valedictory da u Myntri sha baroh kiba wan ïashim bynta, kaba long ka jingithuh ïa ka jingpyndep jong ki ïa ka exchange programme bad nalor kiwei kiwei pat ki prokram.