Ïasoi soskular ka SCSTE bad LEHS ban ïarap ïa ki nongrep bad ki samla pule da ka jingstad AI

Shillong, Jylliew 12 : Ka State Council of Science Technology bad Environment (SCSTE), Meghalaya, bad ka Lords Education and Health Society (LEHS) -Wadhwani AI ka la ïasoi ïa ka Memoran dum of Understanding (MoU) ha ka 10 tarik Jylliew 2026, ha ka ophis jong ka Mitali Chandra, IAS, ha kaba ïadei bad ka jingpyndonkam da ka Artificial Intelligence (AI) na ka bynta ka jingtreikam ba thymmai bad kiwei ki kam pynroi ha ka jylla Meghalaya.
Kane ka jingïatreilang ka sorkar bad ka artificial intelligence ka thmu ban pyndonkam da ki kor ki bor computer ban tehlakam ïa ki jingeh. Ka long ruh ka jing kwah ban pynsuk ha ka treikam trei jam ki nongtrei, sdang da kaba pyndonkam da ka AI ban ïarap ïa ki nongrep ha ki jingthung jong ki bad ki khynnah samla pule ha ka pule puthi jong ki.
Ha ka liang ka rep ka riang, kane ka mut ba ka sorkar lane ka kynhun ka rep ka riang ki la sdang ïatreilang ban pyndonkam da ka AI ban ïarap ïa ki nongrep ban shim ïa ki rai kiba janai bad kiba don nongrim na ki jingkheiñ jingdiah.
Ha ka liang ka pule puthi, kane ka jingïatreilang kan sdang pynithuh ïa ka jingpyndonkam ïa ka AI ha ki skul khnang ban tip ïa ka jingstad ki khynnah skul.
Ka AI mar mar kan peit thuh ïa ka jingstet jong ki ha ka pule puthi, ka jinglah bad ka rukom kynnoh ïa ki ktien khnang ban ai sha ki nonghikai ïa ki kaiphod jong ki khynnah skul. Kane kan ïarap shibun ïa ki nonghikai ba kin tip kino ki khynnah kiba tlot ha ka pule puthi bad ai jingïarap ïa ki.
Ki ar tylli ki kynhun ki dang ïatreilang ban rah ïa ka ‘Artificial Intelligence’ (AI) ha Meghalaya ban pynjem ïa ki jingeh jong ka thaiñ, ban tei ïa ka sap pyntbit halor ka tekinoloji, bad ban pynthikna ba kane ka tekinoloji la pynsuk beit bad shngaiñ.
Haba kren ha katei ka sngi, ka Member Secretary ka SCSTE Meghalaya ka la ong ba ka jingroi ha ka jylla Meghalaya ka donkam ban wanrah da kane ka lad thymmai kata ka AI ha ki liang baroh ha kaba ïadei bad ka kolshor, ka jingïatreilang ka imlang ka sahlang bad kiwei kiwei.
Lyngba ka AI kan lah ban pynskhem bad pynsuk ïa ka rep ka riang, ka pule puthi bad kyntiew ïa ka jingshakri paidbah ha kylleng ka jylla.
U Dr. Neeraj Agrawal, uba dei u Chief Program Officer, Wadhwani AI, u la pynpaw ka jingsngewnguh ïa ka sorkar Meghalaya bad ka and SCSTE Meghalaya na ka bynta kane ka lad ban ïatreilang ha ka ban kyntiew ïa ka AI na ka bynta ka jingktah ha ka imlang ka sahlang bad ka roi ka par.
U la pynthikna ba ka AI jong ka Wadhwani kan ïarap ban pynsuk ïa ki paidbah kiba shem jingeh. Haba nym pyndonkam ïa ka AI tang ban ïoh pisa ne ban pynpaw stad, ki shna pat ïa ki tiar ba myntoi, kiba ñiewkor ïa ka jingshimet bad kiba ïarap ïa u briew.
Ha katei ka jingïasoi, la don ki nongtrei jong ka SCSTE Meghalaya bad ki nongmihkhmat jong ka Lords Education and Health Society – Wadhwani AI.
Kane ka jingïatreilang kaba la khmih lynti ban kyrshan ïa ka jingpyndonkam ïa ki stad shemphang thymmai ki technology thymmai bad ban ïoh bynta ha ka roi ka par kaba neh jong ka Meghalaya.