Nongstoiñ, Lber 23: Ki paidbah ka thaiñ Nongjri Mawsmai, ki la pynpaw ka jingsngew bitar namar haba ka aïom slap ka la dei, hynrei u kontraktor ba pyntrei ïa katei ka surok um shym lah ban pyndep. Ki la dawa ruh da kaba ong ba ka la bha ïa u ba un wan theh dohkha noh ha ki jaka ba la thliew, khnang ba ki paidbah kin ioh ban leit khwai man ka sngi.
Uwei na ki nongshong shnong katei ka thaiñ, u la ong ba lada u kontraktor um don pisa ban pyntrei ïa katei ka surok, un sngewbha ban leit mih sha ka ophis jong u Superintendent of Fisheries ha Nongstoiñ, ban pan symbai dohkha na ka bynta ban pyllait ha ki pung kiba don hapdeng katei ka surok.
Na ka liang ki paitbah ki la pynpaw ïa ka jingbitar ha kaba ki la kynnoh ba ha kaba sdang utei u kontraktor u la wan theh mawria bad sdang ban siang rong. Hynrei hadien ba u la sdang ban trei kumba sanphew mitar ei ei u la sangeh noh bad ïa ki maw ba u la wan theh u la shu ieh kumto.
Ki la ong ruh ba kham hadien pat ki don ki trok kiba wan kit noh ïa ki maw kiba u la wan buh harud surok hynrei kim tip ki leit buh shaei. Ki la ong ruh ba hadien kata, utei u kontraktor u la kynnoh kylla ba ki paitbah katei ka thaiñ ki la tuh lut ïa ki maw bad u la byrngem ruh ban leit mudui da ka ejahar sha ki pulit.
Haba kylli pat la ki la don jingtip ne em mano ba kit ïa ki mawria ba u la wan buh na ka bynta ban siang rong ïa katei ka surok, ki la ong ba ïa kitei ki trok kiba wan kit ki ïohi. Hynrei ki nang tharai ba ki dei ki trok kiba phah hi da utei u kontraktor bad kim shym la kylli ei ei, hynrei kham hadien pat ki la shah kynnoh pynban ba ïa ki mawria la kit lut da ki nongshong shnong katei ka thaiñ.
Katei ka jingkynnoh jong u kontraktor ka la pynbitar bad ki la ong ba utei u kontraktor u dei ban wan mih bad ki rangbah shnong ha Mawdiang ban ïakren halor katei ka jingkynnoh. Lymda kumta kim banse ban dawa bai mynraiñ khmat halor katei ka jingkynnoh bad pynjah burom ïa ki nongshong shnong katei ka thaiñ.
