Yn sdang ïa ka SIR ha ki thup buh kyrteng elekshon jong ki 16 tylli ki jylla bad 3 ki Union Territory

Mawkyrwat, Jylliew 01 : Ka Election Commission of India (ECI) ka la pynbna ïa ka jingïaid shaphrang jong ka Phase-III Special Intensive Revision (SIR) jong ka Electoral Roll ha 16 tylli ki State bad 3 tylli ki Union Territory (UTs), kum shibynta ban pynthikna ïa ka jingbeit, ka jingshisha bad ka jingkhuid jong ka thup kyrteng paidbah thep vote ha kylleng jong ka Ri India.
Katkum ka Press Note ba la pynmih da ka Election Commission of India (ECI), ïa ka jingïaid beit jong ka Phase-III la pynkhreh da kaba pyrkhat ïa ka jingïoh bynta jong ki nongtrei paidbah kiba dang pynlong ïa ka jingthoh bad jingkhein ïing jong ka Census.
Da ka jingpyntreikam ïa ka Phase-III, ka Special Intensive Revision kan kynthup ïa baroh kawei ka ri, lait noh tang ïa ka Himachal Pradesh, Jammu & Kashmir bad Ladakh. Ïa ka prokram na ka bynta kine ki lai tylli ki State/UT yn sa pynbna hadien, hadien ba la dep ka bynta kaba ar jong ka Census bad hadien ka jingpyrkhat ïa ka jinglong jong ka suiñbneng ha ki thaiñ lum ba jrong bad ba ju hap jingïor.
Ha kane ka bynta kaba lai, palat 3.94 lak ngut ki Booth Level Officer (BLOs) kin leit jingïakynduh ïa ki paidbah man la kawei pa kawei ka ïing ban pynshisha ïa ka jingdon jong ki nongthep vote, kaba kynthup haduh 36.73 klur ngut ki nongthep vote. Kin ïoh jingïarap na 3.42 lak ngut ki Booth Level Agent (BLAs) ba la thung da ki seng saiñ pyrthei ha ka por jong ka Enumeration Phase.
Ka Election Commission ka la ban jur ba ka SIR ka dei ka kam paidbah kaba kynthup lang ïa ki nongthep vote, ki seng saiñ pyrthei bad ki ophisar elekshon. Ban pynthikna ïa ka jingïaid beit bad ka jingïashimbynta pura, la kyntu ïa ki seng saiñ pyrthei ban thung ïa ki Booth Level Agent ha man la ki Polling Station.
Ka Commission ka la pyntip ruh ba ha ki ar bynta kiba nyngkong jong ka SIR, kaba la pynlong ha 13 tylli ki State bad Union Territory bad kaba kynthup jan 59 klur ngut ki nongthep vote, palat 6.3 lak ngut ki BLOs bad 9.2 lak ngut ki BLAs ki la ïashimbynta ha ki bynta bapher bapher jong ka jingpynbeit ïa ka Electoral Roll.
Ka Special Intensive Revision ka thmu ban pynkhlaiñ ïa ka rukom treikam jong ka elekshon da kaba pynthikna ba ka thup kyrteng paidbah thep vote ka long kaba thymmai bad kaba dei hok, khnang ban pynsuk ïa ka jingpynlong elekshon kaba laitluid, kaba hok bad kaba shai ha kylleng ka ri India.
Kum shibynta jong ka Special Intensive Revision jong ka Electoral Roll, 2026, ka Election Commission ka la pynbna ruh ïa ka jingïaid beit jong ki bynta bapher bapher jong ka jingpynbeit. Ka tarik ba la buh kum ka Qualifying Date na ka bynta ki nongthep vote ka long 01 tarik u Risaw, 2026.
Ka jingai jinghikai ïa ki Booth Level Officer (BLOs) bad ka jingsam ïa ki Enumeration Form kan long naduh 20 tarik u Jylliew, haduh 29 tarik u Jylliew, 2026. Hadien kata, ki BLO kin leit sha man la ki ïing ban sam bad lum biang ïa ki Enumeration Form naduh 30 tarik u Jylliew, haduh 29 tarik u ‘Naitung, 2026.
Ka jingpynbeit bad jingpynïaid ryntih ïa ki Polling Station kan dep hapoh ka 29 tarik u ‘Naitung, 2026.
Hadien ba la dep ka jinglum jingtip, yn pynmih ïa ka Draft Electoral Roll ha ka 05 tarik u ‘Nailar, 2026. Ka por ban pdiang ïa ki jingkyrpad bad jingpyrshah, ryngkat bad ki kot ki sla ba donkam na ka bynta ban pynrung kyrteng, pynbeit ne weng kyrteng, kan long naduh 05 tarik u ‘Nailar, haduh 04 tarik u ‘Nailur, 2026.
Ka jingphah notice sha kiba ïadei bynta halor ka jingpynbeit bad jingweng kyrteng kan long naduh 05 tarik u ‘Nailar, haduh 03 tarik u Risaw, 2026.
Hadien ba la dep ban bishar ïa baroh ki jingkyrpad bad jingpyrshah, yn pynmih ïa ka Final Electoral Roll ha ka 07 tarik u Risaw, 2026.
La kyrpad ïa baroh ki nongthep vote kiba dei hok ban ai ka jingïatreilang pura bad ki Booth Level Officer (BLOs) ha ka por jong ka jinglum jingtip bad ban pynthikna ba ki jingtip jong ki ha ka Electoral Roll ki long kiba dei bad kiba thymmai.