Yn leh burom ka Kur Samakha ïa ka lyngkhuh snem jong ka jingkhlad noh jong u (L) bah Hindro

Nongstoiñ, Jylliew 01 : Ka jingkhlad noh jong u (L) bah Hindro Samakha u nongïalam ka Raidmynsaw kan dap shisnem thik ha ka sngi balang ban wan ka 3tarik Jylliew.Kumta na ka liang ka kur Samakha baroh kawei ryngkat ki paitbah ka Raidmynsaw kin pynlong ïa ka jingïalang kynmaw burom ïa katei ka lyngkhuh snem ha katei ka 3 tarik ha Langpih ha phyllaw jong ka Raidmysnaw Upper & Secondary school ha ka por 11 baje mynstep.
U bah S.P.Nongphud Chairman ba mynta jong ka Raidmynsaw ha u kyrwaoh ba la pyllait mynta ka sngi u la ong ba na ka liang ka ka Committee jong ka Raidmynsaw bad ka dorbar Kur Samakha ki khot ki wer ïa baroh ki paralok para jor bad ki paitbah kiba ju kyshan bad ïasnoh kti lang ban ïakhun pyrshah ïa ka jingshah thombor ha ki pulit Assam .
U bah Nongphud u la ong ruh ba ki paitbah ka Raidmynsaw bad ka kur baroh kawei kim lah khlem da kynmaw burom ïa utei u rangbah uba la ieng skhem triang naduh ba sdang ban ym ailad ïa ki pulit Assam ba kin pynpulom ïa kino kino ki lkam pynroi ba ka sorkar Meghalaya ka pyn ïoh ha katei ka thaiñ kum ka jingshna ïa ki surok, ki ïng skul khamtam eh ha ka por ba dang sdang ban shna ïa ka ktem pulit jong ka Meghalaya.U la ong ruh ba dei lyngba ka jingïalam jong u ba bun bah ki kam pynroi ki la poi ha ka thaiñ Langpih.