Dawa ka NEHUNSA ïa ka tnat Pule Puthi ka sorkar pdeng ban pynkloi noh ban thung ïa u VC ka NEHU

By Mawphor Editor On Jun 2, 2026

Shillong, Jylliew 01: Ka seng North-Eastern Hill University Non-Teaching Staff Association (NEHUNSA) ha ka shithi ka la dawa na ka tnat Pule Puthi ka sorkar pdeng (Ministry of Education) ba kan pynkloi mardor ban thung ïa u Vice Chancellor ba thymmai, da kaba pynpaw ba ka jingpynbna paidbah ne ka Advertisement na ka bynta katei ka kyrdan kadei kaba la ap bad ka la dei ruh ban mih naduh mynno haba kala don ka kynrum kynram hapoh jong ka skulbah naduh ki ki por ba la dep.
Na ka liang ka Association ha ka shithi ba la phah sha u Secretary, ka MoE ha ka sngi Nyngkong, ka la pynpaw, “Ka ïaroh bad pdiang ïa jingpynmih ïa ka jingpynbna kaba ki la ïai ap bha na ka bynta ka kyrdan Vice Chancellor ka NEHU bad ka jingkhmih lynti ïa katei ka Advertisement kadei kaba kila lah dep don lypa lah slem bha namar ka jingbym lah ban treikam u Prof PS Shukla.”
Shuh shuh na ka liang ka Association ka la kynnoh ïa u Prof Shukla ba ula jied sngewbha dalade ban ieh ïa ka Headquarter jong ka skulbah ha Shillong, bad kynnoh ba u la pyrshang ban leh katba lah ban tuklar na sha jngai ïa ki kam pule puthi bad ïa ka rukom pynïaid ïa ki kam ki jam ka University.
Ka la ong ba kum ka kynhun kaba la rangbah ha ka pyrkhat pyrdaiñ, ka NEHUNSA ka la pynpaw ïa ka jingdon ïa ka jingngeit kaba skhem ha ka Ministry of Education, ba naduh nangne shakhmat yn sa thung ïa u Vice Chancellor u ban long uba la bit lah biang ha ka kyrdan baroh ha kaba ïadei bad ka pule puthi bad ka jinglah ban pynïaid ïa ki kam jong ka skulbah bad ba kan long ruh ha ka lynti kaba khuid ba suba.
Na ka liang ka NEHUNSA ka la banjur ïa ka jingdonkam ban pyndep ha ka por kaba la buh.
Ka la bynrap, “Ka Association ka khmih lynti ban pyndep ïa kane ka jingthungkam mardor kata hashwa jong u Nailar 2026 ban kiar ïa kano kano ka jingthylli ka kam jong u nongialam.”
Ha ka shithi ka la ong, “Kan long kaba sngewtynnad ba lada burom ïa ki aiñ bad ïa ki kyndon aiñ jong ka skulbah ba ha ka jingkut ka samoi treikam jong u Prof PS Shukla kum u Vice Chancellor, kumta u Professor uba la rangbah tam ha ka kam u dei ban shimti kum u Acting Vice Chancellor ka NEHU.”
Shuh shuh ka la maham pyrshah ïa kano kano ka jingthmu ban pynjlan ïa ka samoi treikam ka jong u. Ka la ong, “Kano kano ka jingpyrshang ban pynjlan ïa ka samoi treikam ka jong u Prof PS Shukla kan pyni ba kan long kaei kaei ka ban ktah jur ïa ka jinglong jingman baroh kawei jong ka Skulbah NEHU.”