Katba nang ïaid ki sngi ki por ki sor rit kiba dei ki nongbah jong ki district bad sorbah kaba dei ka nongbah jongka jylla ki la sdang ha kaban roi sted haka liang jong ka jingbuhai shnong jong ki paidbah. Ka jingsdang ban roi sted jong kine ki sor , ka dei namar ba ki lad ban ïa kamai ïa kajih, ka jingdon ki ophis treikam ki tnat sorkar, ka jingdon jong ki skul pule kampher lada dei ha ka liang ki skul rit haduh ki kolej, ki dei ki daw kiba la khring pat ïa ki samla kiba kham pajih na kum kine ki sor, ba kin kiew ban shim ïaka bynta kum ki nongshnong ha kine ki jaka sor
Hynrei kumba ka la jia long, naka liang ka sorkar jylla, ka la pyrshang mynta kat lah kat ïai ban phai khmat sha kine ki jaka sor ban pynbiang lut ïaki jingdonkam naduh ki jaka pule, ki ophis sorkar, ki surok ki umbam umdih , bording bad kumta ter ter khnang ba ki paid nongshong shnong ki kham lait ban kiew ne wan trei wan ktah sha kane ka nongbah Shillong.
Ha ki por ki ïew bah, ka jingïakhaiï ïa pateng ha kum kane ka sngi ka da long shisha kaba heh bha, namar ba ki paidbah na ki shnong ki thaw kiba marjan, ki juh wan ban ïa thied ban ïa tda, ban ïa khaiï bad pateng, namar ka dei ka lad kaba ki lah ban ïoh ban kamai shi sien shi taïew.Haba don kum kine ki ïew bah ba shisien shi taïew, ki paidbah ki wan da ki kali ki motor katba ki lah ba kin ïoh ei.
Ha kum kine ki sngi ba mynta ki sor ki khapngiah bad bunsien ka wanrah ka jingsah kut kali, namar ba ki surok ïaid kali ki ïai long sah kumjuh, nalor kata ki paidbah nongwan shong ïew, kim don satia ïa ki kynja ïing basa ba shipor ba kin lah ba kin shong ban die ïala ki mar ki mata, kaba kut, ka jaka ba ki paidbah nongwan ïew ka long ba kim banse ba kin shong ha ki lynti ïaid kjat jong ki paidbah, kaba wanrah ruh ïaka jingma ïa ki bad ki nongïaid nongïeng.
Nalor ka jingroi sted ha ki ïew ki hat, ki sor ba don ha ka jylla, ki pynpaw ïaka jingsdang ban kiew ruh wat ha ka liang ka jingwan ban buhai shnong jong ki paidbah, kaba da kylla ka la sdang lam sha ka jingbun ki briew. Namar kata ka jingdawa jong ka por, la sdang ban mih ki ki tnum ki tyndai kiba thymmai, kum shi bynta ki ban lah ban kdup ïaka jingwad ïing sah wai jong ki briew, khamtam lei lei ha ki samla kiba poi naka bynta ban wad ïaka jingnang ka jingstad.
Haka jingsdang ban bun ki briew, ki tnum ki tyndai, ka sdang ba kan kjit pat ïa ka jingdon jong ka khyndew, kaba ki trai jaka, haba ki shem bad ïohi ïa ka lad kamai ba ka wan, ki sdang ban tei ruma rutit ïala ki tnum ki tyndai, ha kaba don lei lei ka rukom tei ka long ruh kaba ima, namar ba la shu tei shisha tang ban lah ha kaban pyndap ïaka jingdawa jong ka ïing shong wai da ki paidbah, kiba sdang ban wan buhai shnong thymmai.
Nalor ka jingkhap ngiah sdang ban mih paw ruh ka jingkha roi jong ki jaboh ba mih na man la ki tnum ki tyndai jong ki briew kiba shong ba sah, hangne lei lei, tang shu wan ka aiom slap, ki wah bah ki kylla long ki nongkit ki nongbah ïa kine ki jaboh baroh bad haba la bun palat, ki wah kim lah shuh ban leh ïala ka kamram, hynrei kaba kut ka pynsahtah ïa ki ba tam kiba sah ki jaboh ha ki lynti ki syngkien, kaba u paidbah nonglh dusmon, u hap ba un ïaid nalor kine ki jaboh baroh.
Kumta, ka sorkar jylla ka donkam ba kan thaw ïa ki lad ki lynti da kumno ban lah ban hikai ïa ki paidbah ba kin long lypa kiba peitngor ne kiba ïohi jngai lypa ïaka lawei ka jingkha roi jong ka sobah ka jong ki, toi, ki aiñ ki kanun ki la don, wat la ïalam bakla da ki kato katne ban pyntieng kohtympan ïaki, hynrei donkam ban shim ïa ki lad ban pynsngewthuh bha ïala ki jong ki paidbah da kumno ba kin lah ha kaban bud ïa kum kine ki kyndon, khnang ba ha ki sngi ki snem kiban wan, ki paidbah hi kin nym nangta ha ka jingeh kaba ki la sdang ba kin mad ha kine ki khyndiat sngi kiba la dep.
Kum ki paidbah kin hap ruh ban shim lem ïala ka jingbah khlieh ka jong ki, da kaba maki ki shim ïala ki sien jam da kumno ban lah ha kaban wanrah ïaka khuid ka suba ne ban donkti lem ha kaban pynitynnad lypa ïala ka jong ka sorbah, da kaba kin ïaleh ban long kiba kham adkar ba lada ki tei ïala ki tnum ki tyndai, kim dei ba kin kyntur palat sha ki khappud jong ki wah bah ba ïaid lyngba ka sorbah ka jong ki, nalor kata, ban ïa hikai lem ïala ki para marjan da kumno ban shim ïa ki lad ki lynti ban ïada ruh ïala ki wah khnang ba ka pateng kaban wan kin ïoh ban sakhi ïaka jingkhuid ka jingsuba ka shnong ka thaw bad ki um ki wah .
