Mawkyrwat, Jymmang 31: Ka Indian National Congress (INC) ha ka sngi saitjaiñ jong ka taïew ka 30 tarik u Jymmang, 2026 sngi ka la sdang ïa ka jingïalap elekshon na ka bynta ka MP shiteng samoi na Ïew Mawkyrwat South West Khasi Hills District ha kaba ha kane ka jingïalang paidbah la wan jingïashimbynta ruh da u Vincent H. Pala, MP barim na ka Shillong Constituency bad uba dei ruh u kyrtong jong ka Indian National Congress (INC) uba jingïakhun ha kane ka elekshon shiteng samoi.
Haba ai jingkren ha ka jingïalang, u Vincent Pala ula pynpaw ba shibun ki kam pynroi ki la wanrah hapoh ka jylla lyngba ka jingïatreilang bad ka Sorkar Congress ha ki snem ba ka dang synshar bad don ïa ka bor ha ki jylla bapher bapher bad wat hapoh jong ka Ri India baroh kawei. Ula ong ba kiba bun na kine ki kam pynroi kim shym la paw paidbah haduh katta katta ha kato ka por namar ba ki lad jingïathuh khubor paidbah kum ki social media kim pat long kiba treikam bha kumba long ha kine ki sngi.
U Pala u la khyrwit jur ruh ïa ka Sorkar India kaba la ïalam da ka Bharatiya Janata Party ne BJP, da kaba kynnoh ba ka la pyrshang ban wanrah shibun ki aiñ thymmai kiba lah ban ktah ïa ki kynhun niam Khristan hapoh ka Ri India bad khamtam eh ha ka thaiñ North East.
Ha kajuh ka por, u la kyrpad ïa ki paidbah jong ka South West Khasi Hills District ba kin ai biang ïa ka jingkyrshan ïa ka seng Congress khnang ban nang pynkhlaiñ shuh shuh ïa ka roi ka par ha ka jylla bad ban lah ruh ban ïakhun pyrshah ïa kino kino ki aiñ kiba ka seng ka ñiew ba ki long kiba lehbeiñ ïa ka hok jong ki paidbah.
“Ka Congress ka dei kawei na ki seng saiñ pyrthei kaba lah ban ïeng skhem ban ïakhun pyrshah ïa ka BJP hapoh ka Dorbar Thaw Aiñ jong ka Ri”, ong u Pala.
Kiwei pat kiba la ai jingkren ha kane ka jingïalang ki kynthup ïa u Bah Barrister Thyrniang, Secretary ka District Congress Committee (DCC), u Bah Kynpham V. Kharlyngdoh, President ka District Congress Committee (DCC), u Bah K. Lyngkhoi, Working President ka Meghalaya Pradesh Congress Committee (MPCC), u Bah Gilbert Kharraswai, Secretary ka ACC, lem bad kiwei pat ki nongïalam jong ka seng Congress.
