Shen yn ïeng ka Police Station bad ka Fire Station ba thymmai ha jingkieng Umshyrpi

Shillong, Jymmang 29: Ka Police Station bad ka fire station ba thymmai shen kan sa mih hajan ka jingkieng Umshyrpi ba don ka four-lane, ha kaba ka jaka kaba ar ha shilynter jong katei ka jaka la tyrwa ban buh ïa ka Tourist Information Centre bad ka community office na ka bynta ki Rangbah shnong ka Upper Shillong, ong u Deputy Chief Minister u Bah Prestone Tynsong ha ka sngi Thohdieng ba pynlong ïa ka jingiajurip lang.
U Bah Tynsong, uba bat ïa ka tnad Home bad PWD, u la ong ba ka jingleit ban jurip ka long ban shim noh ïa ka rai noh ïa ki jaka na ka bynta ki jingtei paidbah ba kongsan.
Ka jingleit jurip mynta ka sngi ka long tang ban ithuh ïa ka jaka, la ong u Bah Tynsong.”La synran lang ïa nga da u Assistant Inspector General of Police (Administration), u SP ka East Khasi Hills bad u SP ka Shillong City, ki la ong ba kane ka jaka ka long kaba lah ban leh bad kaba biang bha ban buh ïa kitei ki ar tylli ki station”, u la ong.
Ka jaka kaba ar, la ong u Tynsong, kan pynbeit ïa ki jingdonkam ha ka kam jngohkai pyrthei bad ha ka imlang sahlang ne ka (tourism and community needs).
“Ngi la pyrkhat ban don noh da ka Tourist Information Centre hangtei.Kumjuh ruh man la ka por ki Synjuk Ki Rangbah Shnong ka thaiñ Upper Shillong ki la kyrpad ïa ka sorkar ba kan ai jaka ym duna ïa ka 2000-3000 square feet na ka bynta ka ophis treikam jong ki bad kumjuh ruh ka Community Hall”, u la ong.
Ka jingialang jong ka tnad kan bud ban pynkhih ïa ki projek.”Hadien ka jingjurip, ngan sa khot ïa ka jingialang jong ka tnad khnang ba yn lah ban sdang ïa ka jingthmu.Ngin pynthikna ba kine ki jingtyrwa kin jia kloi katba lah”, u la ong.
U Bah Tynsong u la ai burom ïa kane ka Four-Lane kaba la pynduna ïa ka jingdheng kali shapoh Shillong.
“Naduh ka jingkieng Umshyrpi haduh kaba kut jong kane ka Four-Lane mynta ka shim por lehse 6-7 minit, shwa ka Four-Lane, naduh 7 mer haduh ka jingkieng Umshyrpi ka shim por tang kumba 45 minit, teng teng palat ïa ka shi kynta”, u la ong.
“Ynda la pyndep ïa kane ka Four-Lane ka long ka jingkyrkhu ïa ka jylla, ïa ki paidbah, ïa ki nongleit nongwan kiba leit bad mih na Shillong lyngba kane ka surok.Ngim don jingeh than ban ap ha surok mynta,” u la bynrap.
“Ïa ka jingtrei ban pyndep pura hap ban leh da ka kompeni, shen eh u Chief Engineer, National Highways, ryngkat bad ka kynhun jong u, ka Synjuk Ki Rangbah Shnong, u BDO ka Mylliem block, bad ka kompeni kin sa don ka jingjurip lang.
U la ong ba ki jingtei ha ka kam jngohkai pyrthei kin ioh jingtip ïa ki nongwan jngohkai kiba kwah leit sha ki jaka bapher bapher.
“Ha kine ki khyndiat sngi ngan sa khot ïa ka jingïalang bad ka tnad jngohkai pyrthei ban ïatreilang kumno ngin shna ïa kane ka jingtei khnang ban pynsuk ïa ki nongjngohkai pyrthei kiba kwah ban leit sha kylleng ki bynta bapher bapher jong ka jylla jong ngi – sha Dawki, sha Sohra, lane wat sha Nongstoin ne Garo Hills lyngba kane ka thaiñ,” u la ong.
“Nga ïohi ba kane ka jaka ka long kaba donkam haduh katta katta kumta ngi lah ban pyndonkam ïa ka na ka bynta ki jingtei kiba ïadei bad ka roi ka par bad ka jingbha jingmiat jong ki paidbah ka jylla jong ngi baroh kawei,” u la bynrap.
Halor ka jingjan bad ka jaka jong ki shipai, u Tynsong u la ong ba ka jylla kan pynïadei bad ki bor shipai.”Ka jaka ka don marjan bad ka jaka shipai.Ngi don ka jingiadei bad ka Sorkar India bad ngi iajan bha bad ki bor iada ri ne ka defence”, u la ong.
“Ngi la ioh ïa kane ka jaka na ka bynta ka four-lane lyngba ka jingiatreilang jong ka Defence Ministry, ka sorkar jylla bad ka Ministry of Road Transport.Ha kaba ïadei bad kine ki jaka ba ngi tyrwa na ka bynta ki jingtei, ngin pynthikna ba ngin leit sha ki bor shipai ne military authorities ban kyrshan ia ka sorkar jylla, namar kane kam dei na ka bynta ka jingmyntoi shimet hynrei na ka bynta ka jingmyntoi jong ki paidbah,” u la ong.
“Da lade, ngan shim ïa kane ban pynthikna ba ki jingtyrwa jong ngi ban buh ïa kine ki jingtei ha kine ki ar tylli ki jaka kin ïaid beit ïaid ryntih”, la ong u Tynsong.