Shillong, Jymmang 26 : Tang khyndiat sngi hadien ba ka Cockroach Janta Party ka la mih pyrthei lyngba ki social media, bad kaba la ïoh record na ki samla ban kyrshan lyngba ka Instagram haduh palat 20 million ki nongbud, ki don shibun bah ki jingjia kiba ïashah liang bad kiba pyrshah ïa kane ka party thymmai, ba la seng da uwei u student uba dang pule ïa ka master degree on Public Relation ha Boston Unversity, USA bad uta u dei u Abhijeet Dipke na Pune uba la pyndep ïa ka Bachelor degree ha ka Journalism na Pune hi. Ka sorkar India ka la banned ïa katei ka Twitter ne X Account jong katei ka party thymmai halor ka jingsuba ba ka lah ban pynpait pynpra ïa ka ri da ka jingkyrshan jong ki briew ba na shabar jong ka ri India.
Kaei pat kaba sngewtynnad ka long nalor ba kiwei ki nongïalam jong ka Opposition party kiba kyrshan ïa ka jingmih jong kane ka party thymmai kaba la pynking baiong shisha ïa ka sorkar India dei ka jingpynïasoh jong ki samla kumba beh ka ‘erlangthari. Ym tang katta, ha ka sngi Hatmajai 26.05.26, la ai jingkyrshan ïa ka CJP sa u Anna Hazare, u Social Activist, u nongïakhun pyrshah ‘bamsap’ ba khraw jong ka Ri. U Hazare u ong, ba kane ka jingïakhih (movement) kaba la krih ha ka social media ha kine ki sngi, ka dei ka jingpynpaw jong ki samla ïa ka jinglynga jong ki, ïa kaba ka sorkar kam dei satia ban kheiñ dewthala. U ong lehse ka kyrteng “ñiangkalaw” ka lah ban nym sngewtynnad, hynrei ka khubor bakhraw ha lyndet jong ka, dei kaba donkam eh ban puson. U bteng shuh shuh, “Ka bor jong ki samla, dei ka bor jong ka Ri”.
U ong haba ki samla ki ïatylli mlon ban kyrshan ïa kane ka mat kaba ktah matïong ïa ki, ka sorkar ka dei ban pynshlur ha ka jaka ban theh umpjah. Ka CJP ka dei ka jingïakhih saiñhima kaba siat pharshi da u Abhijeet Dipke kumba la kdew, hynrei ka pawnam bha ha ki social media da kaba ki sei madan ïa ki mat jong ka jingkyrduhkam, ka jinglait tuh ki jingkylli exams kum ka NEET, ka jingkiewdor ki mar ki mata, lyngba ka jingshna dur biria (memes). Nangta, u Anna Hazare u ai jingmut ba ka jingkyrshan ba khlaiñ jong ki samla ïa kane ka jingïatur (movement) ka pynpaw ïa ka jingbymhun jong ki, ïa kiba ka sorkar ka dei ban shim khia mardor. Katba u Sonam Wangchuk ha ka 24.05.26, u nongtrei mon sngewbha bad u riewstad kot na Ladakh, u ong : ‘ba ka sorkar ka dei ban shim ïa ka khubor don aiu ha lyndet jong ka ñiangkalaw hynrei ym dei pat ban pynïap ïa u nongpathai khubor (The government should take the message — don’t kill the messenger)’.
Ha kawei pat ka liang, u Abhijeet Dipke mynta ka sngi, 26.05.26 u la mudui da ka mukotduma ha Ïingshari jong ka Delhi (High Court) pyrshah ïa ka jingkhanglad jong ka sokar ïa ka X twitter account jong ka party jong u khlem ki sabud babiang hynrei tang ha ka jingtharai sniew. La khmihlynti ba katei ka Ïingshari kan shim jingbishar hashwa ba kut jong kane ka taiew. Hynrei na ka office jong ka Court kam pat pynmih order ha ka rukom ba dei. Ka sorkar Maharashtra ka la phah pyrton mynta da ki pulit ban pahara ia ka ïing jong u Dipke ha Pune ban lait ka huri hura. Kum ka jingpynkynmaw, la thaw ïa katei ka party kum ka jingpynpaw pyrshah ïa ka jingkren beiñ jong u Chief Justice ka India, u Surya Kant ïa ki samla ha ka 15.05.2026.
