Ïap lut ki sniang, Ym lah siew ram ki nongrep sha u Bah Sanbor leit pynsngew ka FPFM

Shillong, Jymmang 26: U MLA ka Mawkynrew u Bah Banteidor Lyngdoh ha ryngkat bad ki dkhot jong ka Federation of Piggery Farmers of Meghalaya, mynta ka sngi ka 26 tarik u bnai Jymmang kila leit ban kynduh ia u Bah Sanbor Shullai uba dei u Myntri Sorkar ba peit ia ka tnad Animal’s Husbandry and veterinary ban pynsngew ïa ka jingeh ki nongri sniang.
Ha kane ka jingleit ban kynduh ïa u myntri na ka liang u Bah Napoleon S. Mawphniang, bad kiwei ki dkhot kila aiti da ka dorkhas ban pan jingïarap kyrkieh na ka sorkar ban pyllait im ïa ka kam ri sniang kaba la hiar dor jong ka jylla namar ka jingtuid ki sniang kiba nabar ka jylla.
Haba kren bad ki lad pathai khubor u Bah Napoleon S. Mawphniang u la ong, Ka jingeh ka mih ka la sdang hapdeng u snem 2021 bad 2023 ha kaba bun ki nongrep ki la pyndonkam ïa ki ram ba heh ba la ioh da ka tnad naduh 15 lak haduh 20 lak ban kyntiew ïa ka kam ri snaing bad ka jinglah ban pymih.
Hadien, ki jingmih ka pang khlam sniang ïa kaba la tip kum ka African Swine Fever (ASF) ki la pur ha kylleng ka thaiñ, ha kaba ki sniang bun kiba iap bad ka pynsah thylli ïa ki sem bad ki jaka ri.
“Ki nongrep mynta, ki ïam.Kim tip shuh ban leh aiu,” la ong u Mawphniang, da kaba pynpaw ba ki longïing kiba la jynjar ki mad ïa ka jingeh kaba khraw ha ka liang ka pisa tyngka namar ki bank ki dawa ban siew noh katba ka tnad Veterinary kam pat ai ïa ka jubab kaba bha ne ka jingïarap.
Kaba pynjynjar ïa kane ka jingeh kadei ha ka liang jong ka ram namar ba ym shym la don ki iew ki ban teh lakam ha kaba ïadei bad ka dor na ka bynta ki sniang ba ri hi ki nongrep bad ka jingwan tuid ki sniang lieh kiba la wanrah na Assam bad Punjab.
U Chairman ka khynhun u bah Prosper Dorphang u la ong, ba ka jingwan jong ki, ka long ba kren halor ka loan kaba ki shim ba ki Bank, naduh ka snem 2023, namar hadien ba ki la shim ïa ka loan, ki la shem ka jingeh ban siew, namar ki Sniang kiba ki ri baroh ki la iap lut, Khlem don uwei ruh u ba Im, kumta ka la wanrah jingeh ia ki ban siew kylla ia ka loan.
Nalor kata ki la ong ruh ka jingeh ba ki ïa kynduh, ka dei namar ka jingwan ki Sniang na sha bar ka jylla, namar ki nongthied kim shym, la wan thied Sniang shuh na ki trai jylla, bun ki thied beit na kine kiba na bar, ha ka dor kaba duna.
Na ka liang u MLA jong ka Mawkynrew, u Bah Banteidor Lyngdoh, u ba la wan synran lang, u la ong ba ka jingwan ki sniang na sha bar ka jylla, ym tang ba pynduna ïa ka dor, hynrei ki wanrah lang ruh lem bad ki jingpang bad dei namar kane bun ki sniang ki ioh pang bad iap.
Kumta u la ong ba ka jingiakren bad u myntri ka long kaba Sngewtynnad, namar na ka liang jong u, u la ong ba un sa khot ia ka jingialang, ia baroh lang, ha ka taiew kaba nynkong jong u bnai Jylliew.