Maham tyngeh ka sorkar ïa ki ar shaka ba kamai, khlem register bad ioh license na DTO

Shillong, Jymmang 26: Ki nongñiah taksi ar shaka ne rapido ki dei ban rejistar ha ka ophis jong ka District Transport bad ban ioh ïa ki laisen shwa ban treikam, ha kaba ka sorkar ka maham ba kan leh da kaba tyngeh ïa kito kiba pynïaid ïa ki kam beain.
U Commissioner & Secretary ba dei peit ïa ka tnad transport u Sanjay Goyal ha ka sngi Nyngkong u la ong ba la dep ban sdang pyntreikam ïa ki jingtalsi pyrshah ïa ki ba pynïaid beaiñ ïa ki ar shaka.
“Ngi la shim ïa ki sienjam pyrshah ïa ki bad ngi la khang ïa ka jaka treikam jong ki la slem bah bad wat hapdeng kata, lada don napdeng jong ki kiba treikam beaiñ, nga kyrpad ïa ki paidbah ban wan shakhmat bad pyntip ne ujor sha ngi, ai ba kin pyndep ïa baroh ki jingdonkam katkum ka aiñ bad nangta kin treikam bad lada ngi lap ne tip ïano ïano ha kaba ïadei bad kane, nga la bthah da kaba shai kdar ha u DTO ban shim kam pyrshah katkum ka aiñ” u la ong.
U la kdew ba ka kynhun myntri ka la pynkhuid ïa ki kyndon pynlang ïa ki bike, ryngkat bad ki kyndon ba kyrpang ‘ai wai bike’ bad ‘ai wai taksi’ na ka bynta ki nongjngohkai pyrthei kiba kham kwah ïa ki kali kiba niah hi.
“Ngi la buh ïa ki kyndon, Ki nongpynïaid ïa ki bike ka la don lypa, ka kynhun myntri ka la dep ban mynjur ïa ki, ngi la don bad kiwei pat ki jait kyndon kiba la khot ‘rent bike’ ‘rent 20 taxi’ ki kyndon, ha kaba kham bunsien ki briew kiba wan na shabar, khamtam eh ki nongjngohkai pyrthei, ki kwah ban shong ha la ka jong ka bike ba ki niah hi ne kwah ban niah hi ïa ka kali bad na ka bynta kata ruh ka don ka kyndon,” ong u Goyal.
Da kaba kdew ïa ka jingduna ka jingtip namar bay m shum la don ka jingpynsngewthuh paidbah, u la kyntu ia ki nongpyniaid ban pyndonkam ïa ka lynti kaba dei katkum ka ain.
“Ngan kyntu biang ïa ki briew ba kin bud ryntih, bad lada shim kabu ïa kine ki kyndon kiba la pyntip da ka sorkar ban ïa kaba rung shapoh, ka lah ban don ka jingeh hangta, namar ba kam don ka jingpynsngewthuh paidbah ban pynsuk kaba ka sorkar ka la leh.”
“Kumta, ngan kyrpad ïa baroh kito ki nongseng kam seng jam lajong kiba kwah ban rung ha kane ka jait kam, sngewbha ban leit sha ka ophis DTO kaba jan tam jong phi, ban pynrung kyrteng ïalade, ban shim ïa ka laisen bad nangta sa sdang ban pyntreikam,” u la bynrap.